عدالتُک حافظ سعید س خلاف بیاکھ اکھ غٲر ضمانتی وارنٹ جٲرِی،”حافظ سعید چھُ پٲکِستان پٮ۪ٹھہٕ کٔشیٖرِ منٛز دہشت گردی ہٕنٛز کاروٲیی کران”: این آئی اے  

نیشنل انویسٹی گیشن ایجنسی (این آئی اے) دِژ  جٔمہِ چہِ أکِس خصوٗصی عدالژ اِطلاع زِ لشکرِ طیبہُک بٲنی حافظ سعید چھُ وُنکیٚنَس پٲکِستانَس منٛز تہٕ چھُ مبینہ طور جموں و کشمیرَس منٛز سرگرم دہشت گرد گروپَن ہتھیار، فنڈ تہٕ ہِدایَت فراہم کران۔ 

ایجنسی طرفہٕ دِنہٕ آمژِ معلوٗمات پتہٕ کوٚر عدالتَن دۄن رٮ۪تَن انٛدر سعیدَس خٕلاف دوٚیِم غٲر ضمانتی وارنٹ جٲری۔ یہِ وارنٹ اوس مرکزی زیر انتظام علاقَس منٛز کٲم کَرن وٲلِس مُبینہٕ دہشت گرد نیٹ ورکَس سۭتۍ وابستہٕ أکِس معاملہٕ کِس سِلسِلس منٛز جٲری کرنہٕ آمُت۔ 

این آیی اے یَن ٲس ‘بھارتیہ ناگرِک سرکشا سنہیتا’ کِس دفعہٕ 75 ہس تحت وارنٹ باپتھ درخاس درٕج کوٚرمُت۔ ایجنسی دِیُت حافظ سعید اکھ نامزد دہشت گرد تہٕ پٲکِستان کِس صوبہٕ پنجاب کِس سرگودھا شہرُک روزَن وول مُلزِم قرار۔