لچھ واد لُکن سرکٲرۍ نوکری دِنہٕ کِس ناوس پٮ۪ٹھ دھوکہٕ، کرٛایِم برانچَن کوٚر مُلزِمَن خٕلاف چارج شیٹ دٲخٕل۔
جموں و کشمیر کرٛایِم برانچٕچ اکنامک آفینسز وِنگ (ای او ڈبلیو) کٔشیٖرِ چھےٚ سرکٲرۍ نوکری فراہم کرنہٕ کِس ناوس پٮ۪ٹھ لوٗکَن نِشہِ پونٛسہٕ وصول کرنَس پٮ۪ٹھ أکِس شخٕصَس خلاف چارج شیٹ درٕج کٔرمٕژ۔ حکامَو چھےٚ مُلزِم سٕنٛز شناخت عبدالرحیم میر ناوٕ سۭتۍ کٔرمٕژ، یُس کُپواڑہ ضِلعہٕ کِس لشتیالُک روزَن وول چھُ۔ یہِ چھُ الزام زِ تٔمۍ اوس لوٗکَن یقین دِوان سرکٲرۍ نوکری دِنہٕ باپتھ امہِ بدلہٕ لچھہٕ واد رۅپیہِ حٲصِل کٔرمٕتۍ۔
چارج شیٹ آیہِ ایف آئی آر نمبر 12/2026 کِس سلسلَس منٛز فاریسٹ مجسٹریٹ، سرینگر عدالتَس منٛز پیش کرنہٕ۔ یہِ ایف آئی آر ٲس تعزیرات ہند کِس دفعہٕ 420، 468 تہٕ 471 ہس تحت درٕج کرنہٕ آمٕژ یۅسہٕ دھوکہ دہی تہٕ جعلسازی سٍتۍ تعلُق تھاوان چھےٚ۔
تٔحقیٖقات مُطٲبِق آو یہِ مقدمہٕ أکِس تحریری شِکایژ پتہٕ برونہہ کُن یَتھ منٛز یہِ الزام لگاونہٕ آمُت چُھ زِ میرَن اوس شکایت کرن وٲلۍ سٕنٛدِس نیٚچوِس سرکٲرۍ نوکری دِیاونُک وعدٕ کوٚرمُت تہٕ تٔمِس نِش پونٛسہٕ وصوٗل کٔرمٕتۍ۔