مرکز کٮ۪ن اعلانن پیٹھ پژھ کرٕنۍ چھےٚ مشکل یوٚ تام نہ تحریری یقین دہانی گژھہِ: عمرعبداللہ
وزیر اعلیٰ عمر عبداللہ ہَن کوٚر ترقیاتی کامٮ۪ن تہٕ مُختٔلِف منصوٗبَن ہُنٛد جٲیزٕ نِنہٕ خٲطرٕ پُلوٲمۍضِلعُک دورٕ۔ اَتھ موقعس پیٹھ کٔر تٔمۍ 231.2 لَچھ رۄپیہِ ہٕنٛزِ لاگتہٕ سۭتۍ مُکمل کرنہٕ آمٕتۍ 8 ترقیاتی پرٛوجکٹَن ہُنٛد افتتاح تہٕ 630.1 لَچھ رۄپیہِ ہٕنٛدِ 11 نوٮ۪ن پرٛوجکٹَن ہٕنٛز تہِ ترٛٲوٕکھ بُنیاد ۔
یِمَن پرٛوجکٹَن ہُنٛد تعلُق چھُ صحت، تٔعلیٖم تہٕ سڑکہِ رٲبطہٕ ہیٚتھ مُختٔلِف شعبَن سٍتۍ۔ یِمَن پرٛوجکٹَن ہُنٛد مقصد چھُ ضِلعَس منٛز بُنیٲدی سٔہوٗلِیات مٔزیٖد بہتر بناونہِ تہٕ عوامس درپیش مُشکِل کم کرٕنۍ۔ ضِلعہٕ ہیڈ کوارٹر پلوامہ ہَس منٛز مُنعقد گژھن واجنہِ جٲیزٕ کِس اجلاسَس منٛز کٔر کابینی وزیٖر، یو ٹی انتظامیہ کٮ۪واعلیٰ افسرو، ضِلعہٕ اِنتِظامیہ کٮ۪و اہلکارو تہٕ پلوامہ اسمبلی ہٕنٛدِ ژۄشوٕے رُکنَو شرکت۔ میٹنگہِ دوران آو ضِلعس منٛز جٲری ترقیاتی کامٮ۪ن تہٕ مُختٔلِف منصوبن ہُنٛد تفصیلی جٲیزٕ نِنہٕ۔
عوٲمی مسلہٕ حل کرنس تہٕ سرکٲرۍ خدماتن جدید بناونس پیٹھ تہِ آیہِ خصوصی توجہ دِنہٕ۔