جموں و کشمیر اسمبلی کٔر وۅستادن ٹی ای ٹی نِش مستثنیٰ کرنٕچ قرارداد منظور۔

جموں و کشمیر قونوٗن ساز اسمبلی کٔر از سرکٲرۍ وۄستادَن ٹیچر ایلیجیبلٹی ٹیسٹ (ٹی ای ٹی) نِش مستثنیٰ دِنس مُتعلِق قراردادٕچ منظوٗری۔ ایوانَس منٛز حُکُمران جمٲژ تہٕ حزب اختلاف دۄشوٕنی ہٕنٛدیو ارکانو کٔر قراردادٕچ حمایت۔ یہِ قرارداد ٲس وزیرِ تعلیم سکینہ ایتوَن بوموارِ دۄہ پیش کٔرمٕژ۔ بۄموارِ دۄہ آیہِ اَتھ پٮ۪ٹھ بَحَث کرنہٕ، تہٕ از گٔیہِ بَحَث دوبارٕ ۔

قراردادَس منٛز چھُ وننہٕ آمُت زِ ایوان چھُ متفقہ طور مرکٔزی حکوٗمتَس اپیل کران زِ سُہ کٔرِن بچن ہُنٛد حق مفت تہٕ لازمی تعلیم ایکٹ 2009 کِس دفعہٕ 23 منٛز ضروٗری قونوٗنی ترمیم تاکہ 1 جنوری 2019 برٛونٛہہ مقرر کرنہٕ آمتٮ۪ن تمام وۄستادَن یِن ٹی ای ٹی دِنہٕ نِش مستثنیٰ کرنہٕ۔

قراردادَس منٛز اوس بیٚیہِ وَننہٕ آمُت زِ مرکٔزی حکوٗمتَس پَزِ ٹی ای ٹی نِش رِعایت دِنہٕ خٲطرٕ تمام قونوٗنی اقدامات تُلٕنۍ تہٕ نیشنل کونسل فار ٹیچر ایجوکیشن (این سی ٹی ای) ذٔریعہٕ ضروٗری نوٹیفکیشن جٲری کرٕنۍ۔

سکینہ اِٹوَن ووٚن زِ یہِ قرارداد یِیہِ مرکٔزی حکوٗمتَس تہِ سوزنہٕ۔