کٔشیٖر: شُمٲلی کشمیر کِس کپواڑہ ضلعس منٛز سڑک حٲدثہٕ، 5 نفر ہلاک۔

شُمٲلی کشمیر کِس کپواڑہ ضِلعَس منٛز سپٕدۍ از أکِس افسوسناک سڑک حٲدثَس منٛز پانٛژھ نَفر ہلاک ۔ سرحدی علاقہٕ کرناہ کِس سامری علاقَس منٛز  گٔیہِ اکھ  سکارپِیو گٲڑۍ أکِس سرٛنہِ کھیٚیہِ منٛز، ییٚمہِ کِس نٔتیٖجس منٛز کم از کم پانٛژھ  نفرہلاک تہٕ باقٕی واریاہ زخمی گٔے۔ 

حُکامَو مُطٲبِق کٔر واقعہٕ پتہٕ فوراً پُلیٖس تہٕ سِوَل اِنتِظامیہَن بچاو کاروٲیی شُروٗع۔ حکامَو ووٚن زِ تمام نفر ٲسِکھ کٲفی کوٗشِشہِ پتہٕ نٮ۪بر کٔڑِمٕتۍ۔ زخمی آے گۄڈٕ ٹینگدار کِس سب ڈِسٹرکٹ ہسپتالَس منٛز منتقٕل کرنہٕ، ییٚتہِ یِمَن طِبی مدد فراہم کرنہٕ آوپتہٕ آیہِ تِم مزید علاجٕ باپتھ جدید طبی مرکزن منٛز منتقل کرنہٕ۔ 

اِبتِدٲیی رپورٹو مُطٲبِق چھِ ہلاک گژھن والٮ۪ن منٛز 32 وُہُر محمد ادریس تہٕ أمۍ سُنٛد نو رٮ۪تُک شُر حمزہ شٲمِل۔ گۄڈنِکۍ رپورٹن ٲس دۄن نفرَن ہٕنٛدِ ہلاکتٕچ تصدیٖق کٔرمٕژ، ییٚلہِ زَن حکامَو اوس وونمُت زِ بچاو کاروٲیی جٲری آسنہٕ سۭتۍ ہیٚکہِ ہَلاکَن ہٕنٛز تعداد ہُرِتھ۔