”چنگیر بناونُک” فن جۅم سرحدی علاقن منٛز وُنہِ تہِ زندٕ۔ زَنانو دِژ رٮ۪وایتَس نٔو زِنٛدگی۔

جوٚمَس منٛز سرحدی علاقہٕ آر ایس پورہٕچ ہوا چھِ وُنہِ تہِ رٮ۪وٲیتی ہُنر تہٕ ثقافتٕچ خوشبو تھاوان۔ یہِ چھُ سُہ علاقہٕ ییٚتہِ چھُ ژانٛگیر بناونُک صدیو پرٛون فن وُنہِ زندٕ۔ چنگیر، یُس عام طور بٹہِ جمع کرنہٕ باپتھ ٹوٗکرِ یا تھوٚپ پٲٹھۍ زاننہٕ چھُ یِوان، چھُ نہ صرف اکھ ضروٗری گَریلو چیٖز بلکہِ چھُ جموں و کشمیرٕچ دستکاری، ثقافت تہٕ زنانہٕ فَنکٲری ہِنٛز علامت تہِ بنٛیوٚومُت۔ یہِ فن چھِ زیادٕ تر گٲمی زنانہٕ رچھان، یِمو گھریلوٗ کامہِ سنٛبھالنس سۭتۍ چھُ یہِ فن زِنٛدٕ تھوومُت تہٕ یہِ آمدنی ہُنٛد ذٔریعہٕ تہِ بنوومُت۔ آر ایس پورہ ہٕچ اکھ نوجوان زنانہٕ پریانکا دیوی چھےٚ یِمَو قٲبِل زنانن منٛز اکھ۔ یوٗ این آی یَس سۭتۍ أکِس خصوٗصی کتھ باتھ منٛز ووٚن پریانکا زِ چنٛگیٖر بناونُک فن چھُ بذات خود اکھ خاص ہُنر۔ أمۍ سٕنٛدِ مُطٲبِق چھُنہٕ ‘چانگیر بناونَس منٛز چھُنہٕ کانٛہہ تہِ مِشیٖن استعمال کرنہٕ یِوان۔ سٲری کٲم چھِ اتھہٕ سۭتۍ کرنہٕ یِوان۔ اتھ خٲطرٕ چھِ نہ صرف صبرٕچ ضرورت بلکہ تخلیقی سوچ تہٕ صفٲیی خٲطرٕ تہِ نظر آسنٕچ ضرورت۔’