*وزیر اعلیٰ عمر عبداللہ ہَن ہوو جے کے ایس پی ڈی سی سی ایس آر پہلہ تحت 7 ایمبولینسَن جھنڈٕ*

وزیر اعلیٰ عمر عبداللہ ہَن کٔر اَز جموں و کشمیر کٮ۪ن پانٛژن ضِلعن خٲطرٕ سَتھ ایمبولینسہٕ تہٕ صحتٕک سامان جموں و کشمیر سٹیٹ پاور ڈیولپمنٹ کارپوریشنَن طرفہٕ پننہِ کارپوریٹ سوشل ریسپانسبلٹی (سی ایس آر) پہل تحت فراہم کٔرمٕژ۔ ایمبولینسہٕ چھِ پوٗرٕ جموں و کشمیرَس منٛز 144.73 لَچھ روپیہِ ہٕنٛدِ قۭمتَس پٮ۪ٹھ بٲگراونہٕ آمٕژ۔ اَمہِ موقعَس پٮ۪ٹھ تقریر کٔرِتھ ووٚن وزیر اعلیٰ زِ "ہنگٲمی صحتٕچ دیکھ بھال تام رسٲیی مضبوٗط کرٕنۍ، خاص پٲٹھۍ پسماندہ علاقن منٛز، چھِ سارِوٕے کھۄتہٕ زِیٛادٕ ترجیح۔ یِم ایمبولینسہٕ کَرِ بروقت طِبی ردعملَس منٛز نمایاں بہتری تہٕ قۭمتی زُو بچاوَن”۔ اَمہِ موقعَس پٮ۪ٹھ ٲس وزیر صحت تہٕ طِبی تعلیٖم سکینہ ایتو، وزیر اعلیٰ سٕنٛدِ ایٚڈِشنَل چیف سیکریٹری دھیرج گپتا، منیجنگ ڈائریکٹر جے کے ایس پی ڈی سی راہول یادو، ڈائریکٹر ہیلتھ سروسز جموں تہٕ باقٕے سینئر افسر موجود۔