کانگریس چھِ دلتَن تہٕ کمزور طبقَن سۭتۍ کھڑا : راہول گاندھی

سینئر کانگریس لیڈر تہٕ پارلیمنٹَس منٛز اپوزیشن لیڈر راہول گاندھی یَن ووٚن بۄموارِ دۄہ زِ تٔمۍ سٕنٛز پارٹی چھِ مضبوٗطی سان دلتَن تہٕ مُلکٕک کمزور طبقَن سۭتۍ کھڑا ۔گاندھی، یُس حالٕے پننِس پارلیمانی حلقہٕ رائے بریلی کِس نصیر آباد علاقس منٛز أکِس دلت سٕنٛدِس قتلَس پٮ۪ٹھ تعزیت پیش کرنہٕ خٲطرٕ ییٚتہِ اوس، کوٚر متوفی سٕنٛدِس عیالَس مالا تہٕ دِژٕن پولیس افسرَن قاتلَن خٕلاف سخٕت کاروٲیی یقینی بناونٕچ ہِدایت۔فرست گنج ہوٲیی اڈَس پٮ۪ٹھ ووٚن راہول گاندھیَن رائے بریلی ڈی ایم تہٕ ایس پی یَس زِ سُہ کرِ ارجن پاسی قتل کیسَس منٛز فوراً سخٕت کاروٲیی یٔقیٖنی بناونہٕ۔
یہِ چھُ یاد یِوان زِ برٛونٛہہ کالہِ آو اکھ دلت نوجوان ارجن پاسی نصیر آباد کِس چھپواریا گامَس منٛز أکِس لۄکٹِس تنازَس منٛز گولہِ سۭتۍ مارنہٕ، ییٚمہِ پتہٕ پولیسَن واریٛاہ مُلزِم گِرِفتار کٔرۍ۔ مگر یہِ چھُ وننہٕ یِوان زِ اکھ دبنگ مُلزِم چھُنہٕ گِرِفتار کرنہٕ آمُت۔راہول گاندھی ووٚن زِ سُہ کَرِ حکوٗمتَس تہٕ انتظامیہ پٮ۪ٹھ دباؤ زِ سُہ کرِ مُتٲثِر جمٲژ انصاف فراہم کرنہٕ خٲطرٕ تِکیازِ سُہ چھُ رائے بریلی پٮ۪ٹھٕ ایم پی۔