حیاتِ طیبہ
﷽
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گۅڈنیُک باب،
اسلٲمی تحریک تہٕ امہِ برونہہ
اسلام یا محمد صلی اللہ علیہ وسلم سُند پیغام چُھ دنیاہٕچ اکھ عظیم الشان اصلٲحی تحریک۔یہِ چھےٚ سۅے تحریک یتھ پرٛتھ زمانس اندر تہٕ پرٛتھ مُلکس اندر خداے سٕنٛدۍ سوزنہٕ آمٕتۍ نبی انان روٗدۍ۔أمۍ تحریکن چُھنہٕ صرف روحٲنی بلکہ چُھم انسٲنی زندگی ہُند پرتھ کانٛہہ شعبہ تیُتھ شورمُت ییٚمٕچ نہٕ کانہہ مِثالٕے ہیٚکہِ نہٕ میٖلِتھ۔یہِ چھےٚ تِژھ اکھ ہمہ گیٖر تحریک یۅسہٕ بہ یک وقت روحٲنی،اخلٲقی،معاشرتی،معٲشی تہٕ سیٲسی سورُے کینہہ چھےٚ۔تہٕ ییٚمہِ کہ دٲیرٕہ منٛزٕ انسٲنی زندگی ہُند کانٛہہ گوشہِ نٮ۪بر چُھنہٕ۔
اسلٲمی تحریکٕچ اہمیت:
دُنیاہس اندر چھےٚ اصلٲحی تہٕ انقلٲبی تحریکہٕ واریاہ وۅتھان روزمژٕ مگر اسلٲمی تحریک چھےٚ پننہِ وُسعتہٕ تہٕ کینٛژھو باقیو خصوٗصیاتو کِنۍ یِمو ساروٕیو کھۅتہٕ مُمتاز۔یہِ تحریک کِتھہٕ پٲٹھۍ ؤژھ؟پیش کرن وٲلۍ کِتھہٕ پٲٹھۍ کٔر یہِ پیش تہٕ امُیٚک ردِ عمل کیا درٛاو؟یِم سوال چھِ پرٛتھ تتھ ذٮ۪ہنس منٛز پٲدٕ سپدان یتھ گۅڈے امہِ تحریکُک کینٛہہ نتہٕ کینٛہہ تعارُف آسان چُھ۔وٕں گوٚو یِمن سوالن ہٕںٛدۍ جواب معلوم کرٕنۍ چھَنہٕ محض تٲریخ دٲنی ہٕںدِ ذوقٕچ تکمیٖلٕے یٲژ کینٛہہ بلکہ چھےٚ یِمن سوالن ہٕںٛز اصلی اہمیت یہِ زِ یِمن معلوم کرنہٕ کِس پاداشس منٛز چھےٚ اکھ تِژھ مکمل اصلٲحی تحریک اسہِ برونٛہہ کُن یِوان یۅسہٕ از تہِ تِم تمام مسلہٕ حل کرنہٕ خٲطرٕ ضروٗری تہٕ کٲفی چھے یِمن منٛز انسان ہٮ۪نہٕ چُھ آمُت۔یہِ تٲریخ چھےٚ انسانس تٔمۍ سٕندِ نفع نقصانُک صحیح مطلب ونان،تس برونٛہہ کنہِ چھےٚ تِمہٕ ابدی زندگی ہٕںٛزٕ حقیقتہٕ واضح کران یۅسہٕ پرٛتھ کٲنسہِ انسانس ٲخری منزل چھےٚ۔امہِ پتہٕ چھےٚ دنیاچہِ زندگی خٲطرٕ تیُتھ اکھ لاحہِ عمل تجویز کران یُس تتھ ابدی زندگی کامیاب بناونس سٍتۍ سٍتۍ یتھ زندگی تہِ تِتھہٕ پٲٹھۍ شیران تہٕ پٲران چُھ زِ پتہٕ چُھ انسانس تِمو تمام پریشٲنیو نِشہِ نجات میلان یِم حل کرنس منٛز سُہ ہمیشہِ پریشان روٗدمُت چُھ تہٕ از تہِ چُھ۔
اسلٲمی تحریکس چھےٚ یہے اکھ خصوصیت یۅسہٕ پرتھ طالبِ علمس چھےٚ مُتوجہ کران زِ سُہ وُچھِن اتھ واریاہ نکھہٕ رٔٹِتھ تہٕ کٔرِن یہِ سمجنٕچ کوٗشش زِ اتھ تحریکس مُتعلق یُس یہِ یوٗتاہ بوٚڈ دعوا کرنہٕ چُھ یِوان،سُہ کتھ حدس تام چُھ دُرست۔
اسلٲمی تحریک سمجھنہٕ خٲطرٕ چھےٚ یِتھہٕ پٲٹھۍ تہِ واریاہ کتابہٕ لٮ۪کھنہٕ آمژٕ تہٕ لٮ۪کھنہٕ تہِ یِن تہٕ یِہٕنٛدِ مدتہٕ سٍتۍ چُھ اسلٲمی تحریکُک نہایت واضح تعارف تہِ سپدان۔وٕں گوٚو یِتھہٕ پٲٹھۍ گاشُک تصور ژانٛگہِ نِشہِ تہٕ خۅشبو یہِ ہُنٛد احساس پوشہِ نِشہِ جُدا یِیہِ نہٕ کرنہٕ تِتھے پٲٹھۍ یِیہِ نہٕ کُنہِ تہِ عظیم الشان تحریکُک وۅتُھن تمہِ کہِ مُحرک کہِ تصوُرٕ نِشہِ الگ کرنہٕ یِتھ۔ اوے موجوٗب ییٚلہِ لُکن برونٛہہ کنہِ اسلٲمی تحریکٕچ ذکر یِوان چھےٚ تِم چھِ تحریکہٕ سان تحریکہٕ کِس داعی حضرت مُحمد صلی اللہ علیہ وسلم سٕںٛزِ زندگی ہٕںٛدۍ حالات میٚیہِ تحریکہٕ کہ دعوتُک اصل ماخذ یعنی قُرآنِ پاکٕچ تشریح تہٕ تفسیرُک مُطالبہٕ کران تہٕ یہِ مُطالبہٕ چُھ بالکل فطری۔