*پرتگال پیٹھٕ کامیاب حوالگی پتہٕ کوٚر این آئی اے یَن نارکو دہشت گردی سۭتۍ وابستہٕ حزب دہشت گرد ‘شیرا’ گِرِفتار*

نیشنل انویسٹی گیشن ایجنسی (این آئی اے) ووٚن بۄدوارِ دۄہ زِ أمۍ چھُ پُرتگال پٮ۪ٹھٕ پنٕنۍ حوالگی کامیٲبی سان حٲصِل کرنہٕ پتہٕ مطلوب نارکو دہشت گرد اقبال سنگھ @ شیرا گِرِفتار کوٚرمُت۔ جی این ایسَس أکِس ہینڈ آؤٹَس منٛز ووٚن پولیسَن زِ سُہ اوس حزب المجاہدین (ایچ ایم) دہشت گردی ہٕنٛدِس مالی اعانت کِس أکِس بٔڑِس معاملَس منٛز ماسٹر مائنڈ۔ شیرا آو اَز قونوٗنی طٔریٖقہٕ کار پتہٕ ہِنٛدُستان اننہٕ۔ سُہ آو پرتگال پٮ۪ٹھٕ یِنہٕ پتہٕ دِلہِ ہَوٲیی اڈَس پٮ۪ٹھ این آیی اے ٹیمَن حِراستَس منٛز نِنہٕ، ییٚتہِ سُہ 2020 ہَس منٛز فرار اوس گوٚمُت۔ أمۍ سٕنٛز کامیٲبی سان حوالگی تہٕ گِرِفتٲری چھِ پٲکِستٲنہِ حمایت یافتہ نارکو تہٕ سرحد اَپارِ دہشت گردی خِلاف این آیی اے چہِ لڑایہِ خٲطرٕ اکھ بٔڑ فروغ ماننہٕ یِوان۔ گرفتار کرنہٕ آمتِس مفرور سٕنٛدِس نِش اوس اکتوبر 2020 پٮ۪ٹھٕ RC-23/2020/NIA/DLI (HM NARCO-TERROR MODULE) معاملَس منٛز أمِس خٕلاف غٲر ضمانتی گِرِفتٲری ہُنٛد وارنٹ (NBW) ۔