*جیلَس منٛز بند ایم پی رشیدس لنگیٹس منٛز مٲلۍ سٕنٛدِس جنازَس منٛز شٲمِل گژھنہٕ باپتھ ضمانت*

بارامولا ہٕکۍ ایم پی انجینئر رشیدَس آو ژٔنٛدٕروارِ دۄہ پننِس مٲلِس حاجی خضر محمد سٕنٛدِس ٲخری رسمَس منٛز شرکت کرنہٕ باپتھ ضمانت دِنہٕ، یُس ایمز دِلہِ منٛز کینٛہہ کالہِ بٮ۪مارِ پتہٕ گزرے۔ خاندانٕکۍ نَفرَو ووٚن زِ رشیدَس چھُ نیہِ دِلہِ منٛز مٲلۍ سٕنٛدِ مرنہٕ پتہٕ جنازَس منٛز شٲمِل گژھنُک اجازت دِنہٕ آمُت۔ راشدَس چھُ 2 جوٗن تام ضمانت دِنہٕ آمٕژ۔ قٲبلِ ذِکِر چھُ یہِ زِ رشیدَس اوسُکھ گۄڈٕ 28 اپریل پننِس بیمار مٲلِس سمکھنہٕ باپتھ عارضی ضمانت دِنہٕ آمٕژ۔ پننِس عیالَس سۭتہِ کینٛہہ دۄہ گُزارنہٕ پتہٕ آو سُہ 6 مئی تِہار جیل واپس۔ خانٛدانٕکۍ ذرایعہن ووٚن زِ خاضِر محمد شیخ سٕنٛز ٲخری رسٕم یِیہِ شُمٲلی کٔشیٖرِ کِس لنگیٹس منٛز تٔمۍ سٕنٛدِس آبٲیی مقامس پٮ۪ٹھ کرنہٕ۔