ہریانہ اسمبلی کین 90 سیٹن پیٹھ ووٹنگ شروع۔

90 رکنی ہریانہ اسمبلی خٲطرٕ گٔیہِ سخت حفاضتس منٛز بٹوارِ دۄہ صبحٲے 7 بجے پولنگ شروع۔ ووٹنگ روزِ شامَس 6 بجے تام جٲری۔ رِیاستَس منٛز کَرِ زٕ کرور کھۄتہٕ زِیٛادٕ رجسٹرڈ ووٹر آز 1,031 امیدوارَن ہٕنٛدِس تقدیر ہُنٛد فٲصلہٕ۔ پوٗرٕ رِیاستَس منٛز چھِ أکِس مرحلَس منٛز پولنگ گژھان۔
ہریانہ کِس چیف الیکٹورل آفیسر پنکج اگروالَن ووٚن جُمعہ دۄہ زِ 2.04 کرور ووٹرَو منٛز چھِ 1.07 کرور مرد، 95.78 لچھ زنانہٕ تہٕ 467 ٹرانس جینڈر ووٹر۔ 18-19 وُہُر وٲنٛسہِ منٛز چھِ 5.25 لچھ نوجوان ووٹر یِم گۄڈٕنِچہِ لَٹہِ ووٹنگ چھِ کران۔ کُل 1.49 لچھ معذور ووٹر یِمَن منٛز 93,545 مرد، 55,591 زنانہٕ تہٕ شےٚ ٹرانس جینڈر تہِ شٲمِل چھِ۔
تٔمۍ ووٚن زِ 85 وُہُر کھۄتہٕ زِیٛادٕ وٲنٛسہِ چھِ 2.31 لچھ ووٹر، یِمَو منٛز 89,940 مرد تہٕ 1.41 لچھ زنانہٕ چھِ۔ اَمہِ علاوٕ چھِ 100 ؤری کھۄتہٕ زِیٛادٕ وٲنٛسہِ ہِنٛدِ 8,821 ووٹر ۔ ملازمت کرن والٮ۪ن ووٹرَن ہُنٛد کُل تعداد چھُ 1.09 لچھ۔