لوٗکَن ہٕنٛدۍ توقعات پوٗرٕ کرٕنۍ چھِ نَیہِ حکومتٕچ اولین ترجیح: ڈاکٹر فاروق عبداللہ

جموں و کشمیر نیشنل کانفرنس (جے کے این سی) کِس صدر ڈاکٹر فاروق عبداللہ ہَن ووٚن زِ انتخابی منشور لاگو کٔرِتھ چھِ لوکَن ہٕنٛز توقعات پوٗرٕ کرٕنۍ نیشنل کانفرنسٕچ حکومتٕچ اولین ترجیح۔ سُہ اوس آز پارٹی ہیڈ کوارٹرَس منٛز پارٹی عہدیدارن، کارکُنَن تہٕ عوٲمی وفدن خطاب کران۔
ڈاکٹر فاروق عبداللہَن ووٚن زِ "اسہِ مِلیوٚو لوکَن ہٕنٛز خٔدمَت کرنُک بیٛاکھ موقعہٕ تہٕ اسہِ چھُ امیُک پوٗرٕ فٲیدٕ تُلُن تہٕ لوٗکَن ہٕنٛدِ راحت باپتھ کٲم کرٕنۍ۔” پٔتِمٮ۪ن 10 ؤرۍ یَن منٛز، خاص طور پٲٹھۍ 2019 پتہٕ، جموں و کشمیر کٮ۪ن لوٗکَن چھُ مُشکِل حالات، غنڈٕ گردی تہٕ جبرُک مُقابلہٕ کوٚرمُت۔ ‘
تٔمۍ ووٚن زِ لوٗکَو چھُ عوٲمی حکومت بننہٕ سۭتۍ راحتُک ساہ تُلمُت، لوٗکھ چھِ زمینی سطحس پٮ۪ٹھ تبدیلیہٕ محسوس کران تہٕ اسہِ چھِ پرٛٮ۪تھ صورتہِ حالَس منٛز لوٗکَن ہٕنٛدِ راحت باپتھ کٲم کرٕنۍ۔