شٔدیٖد گرمہٕ سۭتۍ پریشان کٲشِِرۍ بچہٕ قۄدرٔتی چشمن تہٕ آبشارن کُن رۅخ کرنہٕ خٲطرٕ مجبوٗر ۔

وادی کشمیر، یوٚس پننہِ درمیٲنی تہٕ خوشگوار موسمہٕ خٲطرٕ مشہوٗر چھِ، چھِ وُنکیٚنَس شٔدیٖد گرمَس منٛز لٔگِتھ، ییٚمہِ سۭتۍ نہ صرف دۄہ دِش چہِ زِنٛدگی مُتٲثِر گٔمٕژ بلکہِ چھِ لوٗکَن سٮ۪ٹھاہ تکلیف تہِ پٲدٕ گٔمٕژ۔ اَمہِ شٔدیٖد گرمی ہِنٛدِ لہرٕ نِش بچنہٕ خٲطرٕ چھِ وادی کٮ۪ن مُختٔلِف علاقَن منٛز لُکھ قۄدرٔتی چشمَن، کۄلَن تہٕ آبشارَن کُن پکان۔ خاص طور پٲٹھۍ چھِ جنوٗبی کشمیر کِس اننت ناگ، قاضی گنٛڈ، کوکیرناگ، تہٕ وسطی کشمیر کِس کنگن، گاندربل تہٕ سونامارگَس منٛز بٔڑِس تعدادَس منٛز لوٗکھ سرٛان کران تہٕ قۄدرٔتی آبہٕ ذخٲئرَن منٛز راحت منٛگان وُچھنہٕ یِوان۔