وزیر اعلیٰ عمر عبداللہ ہَن کوٚر سٲبقہٕ اسمبلی ارکانَن خراج تحسین پیش

جموں و کشمیرٕکۍ وزیر اعلیٰ عمر عبداللہ ہَن کوٚر برٛسوارِ دۄہ قانون ساز اسمبلی ہٕنٛدِ اجلاسٕک گۄڈٕنِکہِ دۄہ تعزیتی قراردادٕ ذٔریعہٕ سٲبقہٕ وزیرن تہٕ اسمبلی ارکانَن خراج تحسین پیش۔ اَتھ موقعس پیٹھ کٔر تٔمۍ اسمبلی ہٕنٛدِس سپیکرَس اپیل زِ سُہ کٔرِن تعزیتی حوالن منٛز سلطان پنڈت پوری سُنٛد ناو تراونہٕ آمُت تہٕ یہِ تجویز تہِ زِ ایوانَس منٛز تعزیتی کاروٲیی گژھہِ پارلِمٲنی طٔریٖقہٕ کار مُطٲبِق مختصر تہٕ موثر بناونہٕ یِنۍ۔
ایوانَس خٕطاب کٔرِتھ ووٚن عمر عبداللہَن زِ ‘از چھِ أسۍ تِمَن رہنُماہن یاد کران یِمو پننہِ زِنٛدگی منٛز معاشرٕچ بہتری باپتھ کٲم کٔر۔ اسہِ منزٕ چُھ نہٕ کانہہ تہِ فرشتہٕ۔ پرٮ۪تھ کانٛہہ چھُ غلطیہِ کران- چاہے زٲنِتھ مٲنِتھ یا غٲر زٲنِتھ مٲنِتھ۔’
وزیر اعلیٰ ہن دِیُت سپیکرَس مشورٕ زِ مستقبلَس منٛز یِیہِ ایوانَس منٛز تعزیتی کاروٲیی پارلِمٲنی اندازَس منٛز کرنہٕ، ییٚتہِ سٲبقہٕ ارکانَن زیٖٹھۍ تقریرَو بدلہٕ مختصر اندازَس منٛز خراج تحسین پیش یِوان کرنہٕ۔ تٔمۍ ووٚن، ‘أسۍ سٲری سیاست دان، تہٕ سیاستَس منٛز تقریر چھِ نہٕ زانہہ کم۔