جنوٗبی کٔشیٖرِ منٛز بٔڑِس پٲمانَس پٮ۪ٹھ پولیس چیکنگ مُہِم

جموں و کشمیر پولیسَن چھےٚ جنوبی کشمیر کِس شوپیان، پلوامہ، اننت ناگ، کولگام تہٕ اونتی پورہَس منٛز بٔڑِس پٲمانَس پٮ۪ٹھ تلاشی کاروٲیی تہٕ گاڑِ چیکنگ مُہِم تیز کٔرمٕژ۔ امیُک مقصد چھُ غٲر قونوٗنی سرگرمییہِ رُکاونہِ، مشکوک حرکتَن ہٕنٛز نگرٲنی کرٕنۍ، تہٕ قانون نٲفذ کرَن والٮ۪ن ادارن ہُنٛد حفاظتی جال مٔزیٖد مضبوٗط کرُن۔
پُلیٖس حکامَن مُطٲبِق چھےٚ یہِ کاروٲیی موجودٕ سیکورٹی صورتحالَس تہٕ امن و امان برقرار تھاونہٕ خٲطرٕ ملی ٹنسی ہٕنٛدۍ مُمکِنہٕ خطرَن مدنظر تُلنہٕ آمٕژ۔ راتھ دِلہِ منٛز لال قِلعہٕ دھماکہٕ پتہٕ چھےٚ سیکورٹی ایجنسیہٕ سٲرِسٕے وادی منٛز ہائی الرٹس پٮ۪ٹھ تہٕ پرٮ۪تھ ضِلعَس منٛز چھےٚ پولیسَن غٲر معموٗلی ہُشٲری ہٕنٛدۍ اقدامات تُلمٕتۍ۔
شوپِین پولیسَن کٔر مُختٔلِف علاقَن منٛز اچانک چوکہِ قٲیِم تہٕ کٔرٕکھ ذٲتی ، تِجارتی تہٕ دُ پٔہیہِ سان درجن وادٕ گاڑِ چیک۔ حکامَو ووٚن زِ گاڑٮ۪ن ہٕنٛدٮ۪ن دستاویزَن ہُنٛد معٲینہٕ آو کرنہٕ تہٕ واریاہَن گاڑٮ۪ن ہٕنٛدٮ۪ن مٲلکَن خٕلاف آیہِ کاروٲیی کرنہٕ یِمَو خٔریٖدٲری کرنہٕ باوجوٗد تہِ ٲس نہٕ پننٮ۪ن ناوَن پٮ۪ٹھ مِلکِیت منتقل کٔرمٕژ۔ ٹریفک قونوٗنٕچ تعمیل باپتھ آیہِ ہتہٕ بٔدۍ گاڑِ تہِ چیک کرنہٕ۔