پلوٲمِس منٛز نقلی ایس او جی افسر گرفتار۔
جموں و کشمیر پولیسَن کوٚر بوموارِ دۄہ اکھ شخٕص گِرِفتار ییٚمۍ مُبینہٕ پٲٹھۍ سپیشَل آپریشن گروپ اَفسَر سُنٛد روپ بنوومُت اوس تہٕ عام شہریَن نِش پونسہٕ ٲسۍ رٔٹمٕتی۔ پُلیٖس مُطٲبِق چھےٚ مُلزِم سٕنٛز شناخت الطاف احمد ڈار سُنٛد نیچو اسد اللہ ڈار سٕنٛدِ ناوٕ کرنہٕ آمٕژ، یُس ماروال کاکا پورہ ہُک روزَن وول چھُ۔
پُلیٖس ذرایعَو ووٚن زِ مُلزِمن کوٚر پنُن پان سرینگرُک ایس او جی اَفسَر پیش تہٕ کٔرِنۍ مقٲمی لوٗکَن نِش پونٛسہٕ وصوٗل ۔ واریاہَو مُتٲثِر شہرِیو ٲس پُلیٖسس منٛز شِکایَت درٕج کٔرمٕژ، ییٚمہِ کِس بُنیادَس پٮ۪ٹھ فوری کاروٲیی کرنہٕ آیہِ۔
تٔحقیٖقاتَس دوران ووٚن واریاہَو افرادَو زِ نقلی افسرَن چھُ نہٕ صرف تِمَن دھمکی دِژمٕژ بلکہِ تِمَن نِش نقد رقم تہِ نیُمُت۔ پولیسن کٔرۍیِم سٲری بیان درٕج تہٕ مُتٲثِرَن ہٕنٛز شناخت ۔
پُلیٖس ترجمانَن دِیُت عوامس زور زِ تِم دِیِنۍ عوٲمی مفادَن ہٕنٛدِ حِفاظتہٕ خٲطرٕ کُنہِ تہِ مشکوک یا غٲر قونوٗنی سرگرمی ہٕنٛز اطلاع فوری طور نزدیٖکی پُلیٖس تھانس ۔
تٔمۍ ووٚن زِ جموں و کشمیر پولیس چُھ عوام یِتھٮ۪ن دھوکہ دِنہٕ والٮ۪ن نفرَن نِش بچاونہٕ باپتھ پرعزم ۔