اننت ناگ کِس پانزیہلا تہٕ سالیا جنگلَن منٛز آیہِ ؤسیع پیمانَس پٮ۪ٹھ تلاشٕچ کارروٲیِی، اژنہٕ تہٕ نٮ۪بر نیرنٕچ وتہٕ آیہِ بنٛد کرنہٕ
سیکورٹی فورسَن چھُ جنوٗبی کشمیر کِس اننت ناگ ضِلعس منٛز پانزیلا تہٕ سالیا کٮ۪ن گٔنٮ۪ن جنگلَن منٛز بٔڑِس پیمانَس پٮ۪ٹھ تلاشٕچ کاروٲیی شُروٗع کٔرمٕژ، یَتھ منٛز سپیشَل آپریشنز گروپٕک خصوٗصی ٹیٖم تہٕ سی آر پی ایف کِس اہلکارَن چھِ مُشترکہٕ پٲٹھۍ حصہٕ نِوان۔
ذٔرایعَو دِژ اطلاع زِ علاقَس منٛز شَکاوَر حرکتٕچ معلوٗمات مِلنہٕ پتہٕ کوٚر فوجَن ژیٖرۍ رٲژ جنگلاتی علاقَس گیرٕ۔ مُشکِل علاقَن پٮ۪ٹھ غور کٔرِتھ چھُ یہِ آپریشن انتہٲئی احتیاط تہٕ جدید ٹیکنالوجی ہٕنٛدِ مدتہٕ سۭتۍ انجام دِنہٕ یِوان۔
ذرایعَو ووٚن زِ ایس او جی اننت ناگٕچ خصوٗصی ٹیٖمہٕ چھِ برٛونٛہمہِ صفَس پٮ۪ٹھ ییٚلہِ زن سی آر پی ایف اہلکار گھیرٕ مضبوٗط کرنس تہٕ وتہٕ بنٛد کرنس منٛز چھِ اَہَم کِردار ادا کران۔ ڈرون نگرانی، سونگھن ہونٮ۪ن تہٕ اعلیٰ تکنیکی سازو سامان کہِ مدتہٕ سۭتۍ چھِ جنگلُک پرٮ۪تھ کوٗنَس احتیاط سان تلٲشی یِوان کرنہٕ۔
فوجَن چھِ شَکاوَر دہشت گردَن ہٕنٛدِ ژلنُک امکان ختم کرنہٕ خٲطرٕ علاقٕچ اژنہٕ تہٕ نٮ۪بر نیرنٕچ وتہٕ بنٛد کٔرمٕژ۔