24 اکتوبر جموں و کشمیرس منٛز روٗد تہٕ شیٖن پیٚنُک امکان، تیز واو پکنٕچ تہِ پیشنگویی ۔

کینژن علاقن منز چُھ روٗد پیٚنُک امکان تہٕ تھزرٮ۪ن علاقن منز چُھ ہلکہٕ شیٖن پیٚنُک امکان۔ ریجنل میٹرولوجیکل سینٹر (سری نگر) کہِ أکِس افسرَس مُطٲبِق روزِ وادی کٔشیٖرِ ہُنٛد موسم 23 اکتوبرَس تام زیادٕ تر خۄشٕک۔ تاہم، 24 اکتوبر گژھہِ آسمان اوٚبر، تہٕ واریاہن مقامن پیٹھ ہیکہِ ہلکہٕ پیٹھہٕ درمیٲنی روٗد پیٚتھ۔ موسمی ایڈوائزری منٛز اوسُکھ بیٚیہِ وننہٕ آمُت زِ 23 اکتوبر ژیٖرۍ رٲژ پٮ۪ٹھٕ 24 اکتوبر دُپہرَس تام ہیکہِ وادی ہٕنٛدٮ۪ن کینٛہَن ضِلعن منٛز گرٛیٚکھ تہٕ تیز واو پیٚتھ، ییٚلہِ زَن بَڑٮ۪ن پہٲڑی درَن تہٕ تھزرٮ۪ن علاقَن منٛز ہلکہٕ شیٖن پیٚنُک امکان۔ تاہم، موسمٕچ یہِ تبدیلی روزِ قلیل وقتَس خٲطرٕ، تہٕ 25 پٮ۪ٹھٕ 31 اکتوبرَس تام چھُ موسم سازگار تہٕ پوٗرٕ پٲٹھۍ خۄشٕک گژھنُک امکان۔