سڑک حٲدثَن مدنظر اننت ناگَس منٛز پُلسہٕ کہِ طرفہٕ بٔڑۍ کریک ڈاوُن

حالٕے دۄہَن منٛز سڑک حٲدثَن منٛز تشویشناک اضافہٕ کِس پیش نظر چھُ خاص پٲٹھۍ وادی کشمیر کِس اننت ناگ ضِلعَس منٛز اننت ناگ پولیسَن ٹریفک قونوٗنَن ہٕنٛز خٕلاف ورزی کرَن والٮ۪ن خٕلاف بٔڑِس پیمانَس پٮ۪ٹھ کریک ڈاوُن شُروٗع کوٚرمُت۔ اَمہِ مُہمہِ ہُنٛد بُنیٲدی مقصد چھُ قۭمتی اِنسٲنی جانَن ہُنٛد نۄقصان رُکاوُن تہٕ سڑکہٕ محفوٗظ بناوٕنۍ۔ پُلسہٕ ذرایعو مُطٲبِق چھِ پٔتِمٮ۪و کینٛہَو دۄہَو منٛز مُختٔلِف سڑک حٲدثَن منٛز ہتہٕ بٔدۍ نفر زخمی گٔمٕتۍ، ییٚلہِ زَن واریاہ نَفر موقعہٕ پٮ۪ٹھے موٗدۍ، ییٚمہِ پتہٕ ضِلعہٕ پولیسَن صورتحال سنجیدگی سان نِیُکھ تہٕ فوری طور سخٕت اِقدامات تُلنُک فٲصلہٕ کوٚر۔