*سی آئی کے یَن کٔر سرینگر سنٹرل جیلَس منٛز تلٲشی، دہشت گردی کیسَس منٛز کٔرٕکھ ڈیجیٹل آلات ضبط*

جموں و کشمیر پولیسٕک کاؤنٹر انٹیلی جنس کشمیر (سی آئی کے) ونگَن کٔر دہشت گردی سۭتۍ وابستہٕ أکِس معاملَس کِس سِلسِلس منٛز سنٹرل جیل سری نگرَس منٛز تلٲشی تہٕ کوٚرُکھ ڈیجیٹل مواصلاتی آلات ضبط۔أکۍ اہلکارَن ووٚن خبر رساں ایجنسی کشمیر نیوز آبزرور (کے این او) زِ تلٲشی آیہِ 25 اپریل پولیس تھانہٕ سی آئی کشمیرَس منٛز ایف آئی آر نمبر 06/2023 پٲٹھۍ درٕج کرنہٕ آمٕتۍ أکِس معاملَس منٛز این آئی اے ایکٹَس تحت نامزد أکِس خصوٗصی عدالتہٕ کہِ طرفہٕ وارنٹ جٲری کرنہٕ پتہٕ کرنہٕ۔تٔمۍ ووٚن زِ یہِ مقدمہٕ آو آے پی سی کِس دفعہٕ 153-اے، 505، 121 تہٕ 120-بی تہٕ غٲر قونوٗنی سرگرمیَن (روک تھام) ایکٹ کِس دفعہٕ 13 تہٕ 39 ہس تحت درٕج کرنہٕ۔تٔمۍ ووٚن ووٚن زِ جیل احاطس منٛز شَکاوَر ڈِجٹل دستخطَن ہِنٛدِس موٗجوٗدگی مُتعلِق تکنیکی معلوماتَن پٮ۪ٹھ کٲم کٔرِتھ آیہِ جیل حُکامَن سۭتۍ رٔلِتھ واریاہَن بیرکَن تہٕ بلاکَن منٛز تلاشٕچ کاروٲیی کرنہٕ۔