جوٚمَس منٛز گٔیہِ اکھ مال بردار ٹرین پٹرِ پٮ۪ٹھ ؤسِتھ ،عارضی طور ریل ٹریفک مُتٲثِر ۔
ازصُبحٲے گٔیہِ جموں کَٹھوعہ ضِلعہٕ کِس چھان اروریا ریلوے سٹیشنَس پٮ۪ٹھ اکھ مال بردار ٹرین پٹرِ پٮ۪ٹھ ؤسِتھ، ییٚمہِ کِنۍ جوٚم-کٹھوعہ ریل لنکَس پٮ۪ٹھ واریاہَن گٲنٛٹن ہٕنٛز خلل پٲدٕ سپٕز۔
اہلِکارَو مُطٲبِق گوٚو یہِ واقعہٕ صبحٲے لگ بگ 9:30 بجہِ ۔ یہِ ریلوے پٹٕر چھےٚ جموں و کشمیرَس مُلکہٕ کٮ۪ن باقین حِصن سۭتہِ جورن وول اکھ اَہَم رٲبطہٕ ۔ واقعہٕچ اطلاع موصول گژھنہٕ پتہٕ وٲتۍ ریلوے حٲکِم تہٕ مُتعلقہٕ اہلکار واقعہٕ جایہِ پیٹھ تہٕ نِیُوکھ صورتحالُک جٲیزٕ تہٕ پتہٕ آوپٹرِ پٮ۪ٹھہٕ ویگن أکس طرفس کُن منتقل کرنہٕ تہٕ دوپہرس تام سپُد بیٚیہِ اکہِ لٹہِ ریل ٹریفک بحال ۔
حکامَو ووٚن زِ واقعَس منٛز چھُنہٕ ریلوے جایدادَس کانٛہہ تہِ نۄقصان واتنٕچ اطلاع ۔ صٔحیح وجہ معلوم کرنہٕ خٲطرٕ چھےٚ تفتیش جٲری۔ یہِ چھُ قٲبلہِ ذِکِر زِ جوٚم صوبَس منٛز چھِ امہِ برٛونٛہہ تہِ یِتھۍ واقعہٕ پیش آمٕتۍ۔ وۅں گوٚو ازسپدن وٲلِس حٲدِثس منٛز گوٚو نہٕ کانٛہہ تہِ جٲنی نۄقصان۔