شُمٲلی کٔشیٖرِ منٛز دہشت گرد ماڈیول بے نقاب ، سٲبِقہٕ دہشت گرد گِرِفتار تہٕ اکھ چینی ساختہ پستول تہٕ 16 کارتوس برآمد۔ 

شُمٲلی کشمیر کِس کپواڑہ ضِلعَس منٛز کوٚر سیکورٹی فورسَن دعویٰ زِ تِمو چُھ أکِس سٲبقہٕ دہشت گرد سٕنٛدِ طرفہٕ چلاونہٕ یِنہٕ وٲلِس دہشت گرد ماڈیول بے نقاب کوٚرمُت۔ پولیسَن ووٚن زِ کاروٲیی دوران آو اکھ ‘ہائبرڈ دہشت گرد’ گرفتار کرنہٕ۔ 

پُلسہٕ ترجمانَس مُطٲبِق مِلیوٚو ہندوارہ پُلسَس أکِس سٲبقہٕ دہشت گرد سٕنٛزِ سرگرمیَن مُتعلِق قٲبل معلوٗمات ۔ وننہٕ آو زِ سُہ اوس ہندوارہ-کپواڑہ علاقَس منٛز ممنوعہ گروپ حزب المجاہدین کِس أکِس ماڈیولَس باپتھ ‘ہائبرڈ دہشت گرد’ پٲٹھۍ کٲم کران۔ 

‘ہائبرڈ دہشت گرد’ سۭتۍ چھُ مراد اکھ غٲر فہرست انتہا پسند یُس پننین ہینڈلرَن ہٕنٛدِ طرفہٕ دِنہٕ آمٕژ اکھ مخصوٗص تخریب کٲری یا پُرتشدُد عمل چھُ کران تہٕ پتہٕ چھُ عام زِنٛدگی منٛز واپس یِوان۔ 

اطلاع حٲصِل کرنہٕ پتہٕ کٔر سیکورٹی فورسَن فوری طور ہندوارہ قصبہٕ کِس شناخت شُدٕ ہ  جایہِ پٮ۪ٹھ کاروٲیی شُروٗع۔ پُلسہٕ مُطٲبِق آیہِ تمام ضٔروٗری حِفٲظتی طٔریٖقہٕ کار مُکمل کرنہٕ ییٚمہِ کِس نتیجس منٛز أمِس نِش اکھ چینی ساختہ پستول تہٕ 16 کارتوس برآمد کرنہٕ آے ۔