وادی کٔشیٖرِ منٛز روٗد، گُریزَس منٛز  تازٕ شیٖن ،بیٚیہِ  تہِ رُدٕگرٛایہِ  پیٚنُک امکان۔

جموں و کشمیرُک موسم ہیکہِ یِنہٕ والٮ۪ن 24 پٮ۪ٹھٕ 48 گھنٹَن منٛز بیٚیہِ اکہِ لٹہِ بدلِتھ۔ محکمہ موسمیات (ایم ای ٹی) تہٕ ‘کشمیر ویدر’ طرفہٕ جٲری کرنہٕ آمژِ تازٕ پیشنگویی مُطٲبِق چھُ 17 تہٕ 18 ستمبر مرکزی زیر انتظام علاقہٕ کٮ۪ن واریاہَن علاقن منٛز رُدٕ گرٛایہِ پیٚنُک اِمکان۔

موسمیات مٲہرِ ن ہُنٛد ونُن چھُ زِ حالانٛکہِ چُھنہٕ واریاہس کالس یا لگاتار روٗد پیٚنُک امکان مگر مُختلِف علاقَن منٛز ہیکہِ وقفہٕ وقفہٕ روٗد تہٕ چھُکہٕ روٗد  پیٚتھ۔ اتھ وقتس دوران ہیٚکہِ کینٛژھن جاین تیز واو پٔکِتھ، ڈوٹھہ تہٕ شدید روٗد  تہِ پٮ۪تھ۔ رپورٹہِ مُطٲبِق گژھِ 18 ستمبر پٮ۪ٹھٕ موسم بہترتہٕ یہِ روزِ پوٗرٕ دۄہس نسبتاً خۄشٕک، تاہم دُپہرَس یا شامَس ہیکہِ أکِس یا دۄن جاین  گگرایو سان ہلکہٕ روٗد پیٚتھ۔ اَمہِ پتہٕ چھُ 19 پٮ۪ٹھٕ 22 ستمبرَس تام جموں و کشمیرَس منٛز مجموعی موسم خۄشٕک روزنُک اِمکان، حالانٛکہِ أکِس یا دۄن مُقٲمی مقامَن پٮ۪ٹھ چھُ کم وُش روٗد پیٚنُک امکان ۔