شمالی کشمیر کِس بانڈی پورہ ضلعہٕ کِس ناگمرگَس منٛز گوٚو مُقابلہٕ شروع۔

بۄموارِ دۄہ صُبحٲے گوٚو شُمٲلی کٔشیٖرِ ہِنٛدِس بانڈی پورہ ضِلعہٕ کِس ناگمرگ علاقس منٛز سیکورٹی فورسَن تہٕ دہشت گردن درمِیان مُقابلہٕ۔
فوجٕچ چنار کورَن ووٚن بۄموارِ دۄہ ‘ایکس’ پٮ۪ٹھ أکِس پوسٹَس منٛز زِ دہشت گردَن ہٕنٛز موٗجوٗدٕگی ہٕنٛز قٲبلِ اعتماد اطلاع مِلنہٕ پتہٕ کوٚر فوج تہٕ پولیسَن بانڈی پورہَس منٛز ناگمرگَس گیرٕ بٔنٛدی تہٕ کوٚرُکھ آپریشن شروع۔
تٔمۍ ووٚن زِ "ہوشیار جوانَن وُچھ مشکوک سرگرمی تہٕ ییٚلہِ چیلنج کرنہٕ آو تیٚلہِ کٔر دہشت گردَو اندھا دھند گولہِ، ییٚمیُک جواب جوانَو دِیُت”۔
پوسٹَس منٛز ووٚن بیٚیہِ زِ علاقَس منٛز چھِ آپریشن جٲری۔
حُکامن ووٚن زِ دۄہ برٛونٛہہ کٔر حِفاظتی فوجن ناگمرگ علاقس گیرٕ بٔنٛدی تہٕ دہشت گردن ہِنٛزِ موٗجوٗدٕگی ہِنٛز اطلاع پتہٕ کٔرٕن تلاشی کاروٲیی شُروٗع۔
تٔمۍ ووٚن زِ چیلنج کرنہٕ پتہٕ کٔر مشتبہ دہشت گردن سیکورٹی فورسس پٮ۪ٹھ گولہِ چلٲوِتھ، ییٚمہِ سۭتۍ دۄشوٕنی فریقن درمیان مُقابلہٕ گوٚو۔
وننہٕ چھُ یِوان زِ زٕ پٮ۪ٹھ ترٛےٚ دہشت گرد چھِ گیرٕ بٔنٛدی منٛز پھٔسِتھ۔