سرینگر کِس ناروہ علاقس منٛز نار، 5 مکان خاکستر ۔

سرینگر کِس نارواڑہ علاقس منٛز راتھ رٲژ نار لگنہٕ کِس أکِس خوفناک واقعس منٛز آیہِ 5 رہائشی مکانات زالنہٕ۔ ذٔرایعو دِژ اطلاع زِ بۄموارِ دۄہ رٲژ تقریباً 10 بجہِ لوٚگ أکِس گَرٕ منٛزٕ نار، تہٕ نار لوٚگ ہمسایہِ گَرَن تہِ۔ فائر اینڈ ایمرجنسی ڈپارٹمنٹٕکۍ أکۍ اہلکارَن ووٚن زِ نار لگنٕچ خبر مِلنہٕ پتہٕ آیہِ مُختٔلِف فائر سٹیشنَو پٮ۪ٹھ 13 فائر ٹینڈر واقعہٕ جایہِ پٮ۪ٹھ سوزنہٕ۔ تٔمۍ کوٚر ذِکِر زِ گٔنۍ آبٲدی وٲلۍ علاقہٕ کہِ وجہ سۭتۍ پٮ۪وٚو نار بنٛد کرن والٮ۪ن نار بنٛد کرنس منٛز شٔدیٖد مشکلاتَن ہُنٛد سامنہٕ۔ تِمَو ووٚن زِ اَتھ واقعَس منٛز آیہِ 5 رِہٲیشی گَرٕ زالنہٕ۔ نار لگنٕکہِ وجہہ چھٗ وٗچھنہٕ یوان ۔ وۄنٛہِ گوٚو، اَتھ واقعَس منٛز چھُنہٕ کانٛہہ تہِ جٲنی نۄقصانٕچ اطلاع۔ یہِ چھُ قٲبلِ ذِکر زِ سرینگر کِس فائر اینڈ ایمرجنسی سروسز ڈیپارٹمنٹَن چھُ جموں و کشمیرَس منٛز بڑَن وٲلۍ درجہٕ حرارتَس روشَس منٛز اکھ ایڈوائزری جٲری کٔرمٕژ، یَتھ منٛز فائر سروسٕکۍ تمام انچارجن نارٕ سۭتۍ حفاظت تہٕ احتیاطی تدابیرَن مُتعلِق بیدٲری ہٕنٛز مُہِم چلاونٕچ ہدایت چھِ دِژمٕژ۔