بارہمولہ اِنتِظامیہَن کوٚر صحافیَن ہٕنٛز تصدیٖق کرنُک عمل شُروٗع ۔

بارہمولہ ضِلعہٕ اِنتِظامیہَن چھُ میڈیا شناختُک غلط استعمال تہٕ نقلی صحافتُک بڑوُن رُجحان رُکاونہٕ خٲطرٕ مقٲمی صحافیَن ہٕنٛز سند تہٕ تصدیق کرنُک عمل شُروٗع کوٚرمُت۔ اَتھ سلسلَس منٛز چھُ ڈِسٹرکٹ انفارمیشن آفیسر سٕنٛدِ دفتر طرفہٕ اکھ باقاعدٕ حُکُم جٲری کرنہٕ آمُت، یَتھ منٛز ضِلعَس منٛز کٲم کَرن وٲلۍ تمام صحافیَن ہدایت چھُ دِنہٕ آمُت زِ تِم کٔرِن پنٕنۍ تفصیٖل تہٕ سند سَتن دۄہَن انٛدر دٲخل ۔
یہِ کاروٲیی چھےٚ جوائنٹ ڈائریکٹر آف انفارمیشن، کشمیر سٕنٛدِس حُکمَس تحت کرنہٕ یِوان۔ حُکمَس منٛز چھُ وننہٕ آمُت زِ تمام میڈیا اہلکارَن چھےٚ پنٕنۍ تفصیٖل بارہمولہ انفارمیشن آفسَس منٛز جمع کرٕنۍ۔
سرکٲرۍ بیانَس مُطٲبِق چھُ اَمہِ اقدامُک مقصد ‘صحافتُک تقدس برقرار تھاوُن’ تہٕ جعلی صحافیَن ہُنٛد بڑوُن مسلہٕ رُکاوُن، یُتھ زن صرف جٲیز تہٕ تصدیق شُدٕ میڈیا اہلکار ہیٚکن ضِلعَس منٛز پنٕنۍ پیشہٕ ورانہٕ فرائض انجام دِتھ ۔
حُکُم چھُ یہِ تہِ واضح کران زِ صِرِف تِم صحافی یِم ڈِسٹرکٹ انفارمیشن آفس کہِ ذٔریعہٕ ‘رسمی طور تصدیق شُدٕ’ چھِ، تِمنٕے یوت چُھ سرکٲرۍ تقریبن، پریس کانفرنسَن تہٕ باقٕے سرکٲرۍ تقریبن منٛز شِرکت کرنُک اجازت ۔