جوٚمَس منٛز پی ایس اے یَس تحت گِرِفتار کرنہٕ آمٕتۍ زٕ بدنام مُجرِم آیہِ پوٗنٛچھ جیل منتقل کرنہٕ

جموں پولیسَن کٔر برٛسوارِ دۄہ پبلِک سیفٹی ایکٹ (پی ایس اے) تحت زٕ مطلوب مُجرِم گِرِفتار تہٕ تِم کٔرٕکھ پوٗنٛچھ جیلَس منٛز منتقٕل۔ پُلسہٕ مُطٲبِق ٲسۍ دۄشوے نفر واریاہَو رٮ۪تَو پٮ۪ٹھ مُجرمانہٕ سرگرمیَن منٛز شٲمِل تہٕ عدالتہٕ نِش بار بار ضمانت حٲصِل کرنہٕ پتہٕ کٔرِن مُجرمانہٕ سرگرمی بیٚیہِ شُروٗع۔گِرِفتار کرنہٕ آمٕتۍ شکاوَرن ہٕنٛز شناخت چھِ آر ایس پوٗرہٕک روزَن وٲلِس پرمجیت کُمار عرف جنگی تہٕ ارنیاہٕچ روزَن وٲلۍ شُبھم سینی عرف منڈی ناوٕ سۭتۍ کرنہٕ آمٕژ۔اَکہِ حُکوٗمتی ترجمانَن ووٚن زِ پرمجیت کُمار چُھ جموں کہِ ڈِسٹرکٹ مجسٹریٹ سٕنٛدِ طرفہٕ جٲری کَرنہٕ آمٕتہِ باقاعدٕ حِراستَس تحت تھاونہٕ آمُت، ییٚمہِ پتہٕ سُہ پوٗنٛچھ ضِلعہٕ جیل منتقٕل کرنہٕ آو ۔ شُبھم سینی، ییٚمِس خٕلاف حالٕے رٮ۪تَن منٛز واریٛاہ مُجرِمانہٕ مُقدِمہٕ درٕج چھِ کٔرمٕتۍ، تہِ چھُ پی ایس اے یَس تحت حِراستَس منٛز نِنہٕ آمُت تہٕ أتھۍ جیلَس منٛز تھاونہٕ آمُت۔پُلسہٕ مُطٲبِق کٔر دۄشوٕے شکاوَر افرادَو بار بار عدالتَو نِش ضمانت حٲصِل تہٕ بیٚیہِ ٲسۍ غٲر قونوٗنی سرگرمیَن منٛز شٲمِل، ییٚمہِ کِنۍ پبلِک سیفٹی ایکٹَس تحت یِمَن خٕلاف کاروٲیی کرنٕچ ضروٗرت پیٚیہِ۔