سی آیی کے کہِ طرفہٕ فٲصلہٕ کُن کریک ڈاوُن ، ‘میوچل اکاؤنٹس’ ذٔریعہٕ کٲم کرن وٲلۍ مٲلی نیٹ ورک بے نقاب ، 22 نفر حراستَس منٛز

کاؤنٹر انٹیلی جنس کشمیرَن کٔر سائبر فراڈ تہٕ دہشت گردی سۭتۍ وابستہٕ مٲلی نیٹ ورکَن خٕلاف اکھ بٔڑ کارروائی، یَتھ دوران کٔرٕکھ وادی منٛز اَکی وِزِ چھاپہٕ، یَتھ دوران ‘میوچل اکاؤنٹس’ ہُنٛد اکھ وسیع تہٕ منظم نیٹ ورکُک انکشاف آو کرنہٕ۔ حکامَن مُطٲبِق اوس یہِ نیٹ ورک آن لائن فراڈ، غٲر قونوٗنی بیٹنگ ، زار، نقلی سرمایہ کٲری ایپ، تہٕ باقی سائبر جُرمَو ذٔریعہٕ حٲصِل کٔرمٕژ بٔڑۍ رقمَن ہُنٛد ژوٗرِ تہٕ منتقٕل کرنَس منٛز مُلوث۔

تصدیق شُدٕ خُفیہٕ زانکٲری ہِنٛدِس بُنیادَس پٮ۪ٹھ اوس سی آئی کشمیرَن سی آئی کشمیر پُلیٖس تھانس منٛز ایف آئی آر نمبر 06/2025 درٕج کوٚرمُت، یَتھ منٛز آئی ٹی ایکٹ 2000 ہٕچ دفعہٕ 66(سی)، 66(ڈی)، تعزیرات ہند 2023 ہٕکۍ واریاہ دفعہٕ، تہٕ غٲر قونوٗنی سرگرمین (روک تھام) ایکٹُک (یو اے پی اے) دفعہٕ 13 شٲمِل چھِ۔ تحقیٖقاتَس دوران گوٚو یہِ ظٲہِر زِ اَکہِ منظم سنڈیکیٹَن چھُ کمزور تہٕ غریب نفرَن ہِنٛدٮ۪ن ناوَن پٮ۪ٹھ کھولنہٕ آمٕتۍ بینک کھاتہٕ ‘میوچل اکاؤنٹس’ پٲٹھۍ استعمال کوٚرمُت۔