10 پٮ۪ٹھٕ 12 مارٕچ تام کٔشیٖرِ منٛز ہلکہٕ شیٖن تہٕ روٗد پیٚنُک اِمکان

محکمہٕ موسمیات چہِ پیشن گویی مُطٲبِق چھُ کمزور مغربی لہرِ ہٕنٛدِس اثرَس تحت 10 پٮ۪ٹھٕ 12 مارٕچ تام وادی کٔشیٖرِ منٛز ہلکہٕ شیٖن تہٕ روٗد پیٚنُک اِمکان، ییٚلہِ زَن 7 پٮ۪ٹھٕ 12 مارٕچ تام درجہٕ حرارتَس منٛز نمایاں کمی ییہِ ریکارڈ کرنہٕ۔
محکمٕکۍ ترجمانَن ووٚن زِ 6 مارٕچ دۄہ چھُ وادی ہُنٛد موسم عام طور خۄشٕک روزنُک امکان
تٔمۍ ووٚن زِ 7 پٮ۪ٹھٕ 9 مارٕچَس تام ہیکہِ موسم عام طور اوٚبُر روزِتھ، تہٕ اَتھ وقتَس دوران ہیکہِ کینژن پہٲڑی علاقَن منٛز ہلکہٕ شیٖن یا روٗد پیٚتھ۔
تٔمۍ ووٚن زِ امہِ پتہٕ ہیکہِ 10 پٮ۪ٹھٕ 12 مارٕچ تام کمزور مغربی لہرِ ہٕنٛدِس اثرس تحت وادی کٮ۪ن مٲدانن منٛز ہلکہٕ روٗد پیٚتھ، ییٚلہِ زن پہٲڑی علاقن منٛز ہلکہٕ شیٖن پیٚتھ۔
ترجمانَن ووٚن زِ 13 پٮ۪ٹھٕ 15 مارٕچَس تام ہیکہِ موسم عام طور خۄشٕک روٗزِتھ۔
تٔمۍ ووٚن ووٚن زِ پتہٕ 16 پٮ۪ٹھٕ 17 مارٕچَس تام ہیکہِ موسم بیٚیہِ عام طور اوٚبُر روزِتھ، تہٕ اَتھ وقتَس دوران چھُ کینٛہَن پہٲڑی علاقَن منٛز ہلکہٕ شیٖن پیٚنُک یا روٗد پیٚنُک اِمکان۔