ایس ایس اے فنڈَن ہٕنٛدِ مُبیعنہٕ خرد برد کِس معاملَس منٛز آو چارج شیٹ درٕج کرنہٕ: کرائم برانچ کشمیر

کرٛایِم برانچ جموں و کشمیرٕکہِ اکنامک آفینسز وِنگ (ای او ڈبلیو) چھُ سرو شِکشا ابھیان (ایس ایس اے) سکیٖم تحت منظور شُدٕ سرکٲرۍ رقمَن ہٕنٛدِ مبینہٕ خورد برد کِس معاملَس منٛز ایف آئی آر نمبر 43/2018 منٛز سَتَن ملزمن خلاف سپیشل اینٹی کرپشن کورٹ بارامولاہَس برٛونٛہہ کَنۍ چارج شیٹ درٕج کٔرمٕژ۔
وِنگ ہٕنٛدِ ترجمانَن ووٚن زِ مُلزِمن خٕلاف یہِ چارج شیٹ چھِ رنبیر پینل کوڈ (آر پی سی) کِس دفعہٕ 420 تہٕ 120-بی تہٕ جموں و کشمیر اینٹی کرپشن ایکٹ کِس دفعہٕ 5(2) تحت درٕج کرنہٕ آمٕژ۔
تٔمۍ ووٚن زِ یہِ مقدمہٕ اوسُکھ أکِس تحریری شِکایتَس پٮ۪ٹھ درٕج کرنہٕ آمُت یَتھ منٛز یہِ الزام اوس دِنہٕ آمُت زِ سروا شِکشا ابھیان (ایس ایس اے) سکیٖمَس تحت ہمپورہ کرال گُنٛڈ گامَس منٛز اکھ سکوٗل عمارت بناونہٕ خٲطرٕ منظوٗر کرنہٕ آمٕتۍ سرکٲرۍ فنڈز چھِ خرد برد کٔرمٕتۍ۔ اَتھ پرٛوجکٹَس تحت آیہِ سکول عمارتَس سۭتۍ کِچن، پاخانہٕ تہٕ ریمپ بناونٕچ تہِ منظوری دِنہٕ۔