عوٲمی مسلہٕ حل کرٕنۍ تہٕ سڑک رٲبطہٕ بہتر بناوٕنۍ چھِ اولین ترجیحاتن منٛز: وحید الرحمان پرہ

ضِلعہٕ پلوامہ ہٕچ ساروٕے کھۄتہٕ اہم سرکلر گیلینڈر روڈٕچ مرمت تہٕ میکڈمائزیشن چھِ ٲخٕر کار شروع گٔمٕژ، ییٚمہِ سۭتۍ مقٲمی لوٗکَن تہٕ مسافرَن واریاہ راحت میلان چھےٚ۔ یہِ اہم سڑک ٲس وارِیاہ کالہٕ پٮ۪ٹھہٕ شٔدیٖد خستہٕ حالتَس منٛز، ییٚمہِ سۭتۍ نہ صرف ضِلعہٕ ہیڈ کوارٹرَن ہُنٛد وادی کٮ۪ن باقٕے علاقن سۭتۍ رٲبطہٕ مُتٲثِر اوس گوٚمُت، بٔلکہِ لوٗکَن خٲطرٕ دۄہ دِش یِنہٕ وٲلِس سفرَس منٛز تہِ شٔدیٖد مُشکِلات پٲدٕ سپٕدمٕتۍ ٲسۍ۔ مقٲمی باشندٕ مزمل منظور سٕنٛدِ مُطٲبِق اوس یہِ قدم امہِ وقتٕچ اکھ اہم ضرورت۔ تٔمۍ ووٚن زِ سڑکہِ ہٕنٛز خراب حالت آسنہٕ کِنۍ چُھ کینٛژھن منٹن ہُنٛد سفر گھنٹن منٛز تبدیل گژھان، مگر وۄنۍ چھُ میکاڈمائزیشن سۭتۍ عوامٕچ واریاہ کالہٕ پٮ۪ٹھٕچ منگ پوٗرٕ گٔمٕژ۔  اَتھ موقعَس پٮ۪ٹھ میڈیاہَس سۭتۍ کَتھ باتھ کٔرِتھ ووٚن ایم ایل اے وحید الرحمن پراہن زِ ضِلعَس منٛز سڑکہِ رٲبطہٕ مضبوٗط کرٕنۍ تہٕ عوامٕک اصلی مسلہٕ حل کرٕنۍ چھِ تٔمۍ سٕنٛز سارِوٕے کھۄتہٕ اولین ترجیح۔