این سی ایم ایل اے تنویر صادق سٕنٛدِس متنازعہ بیانَس پٮ۪ٹھ اننت ناگَس منٛز بی جے پی پارٹی  ہُنٛد احتجاج، معٲفی منگنٕچ منٛگ۔

بھارتیہ جنتا پارٹی (بی جے پی) چھُ نیشنل کانفرنس (این سی) ایم ایل اے تہٕ پارٹی ترجمان تنویر صادق سٕنٛدِس کٲشِرۍ لوٗکَن ہٕنٛدِس پٔتِمِس حالَس مُتعلِق دِنہٕ آمتِس أکِس متنازعہ بیانَس پٮ۪ٹھ سخٕت ردعملُک اظہار کوٚرمُت، تہٕ منٛگ کٔرمٕژ زِ سُہ مٔنٛگِنۍ بیان واپس  نِتھ  کٔشیٖرِ ہٕنٛدٮ۪ن لُکن معٲفی۔ اَتھ تناظرَس منٛز کوٚر بی جے پی یَن جنوٗبی کشمیر کِس اننت ناگ ضِلعس منٛز اکھ احتجاجی مُظٲہرٕ، یَتھ دوران تنویر صادق سُنٛد پۄتُل زالنہٕ آو ۔ مُظٲہِرین کٔر این سی حکوٗمتَس تہٕ تنویر صادقَس خٕلاف زورٕ  دار نعرٕہ بٲزی۔ 

تنویر صادقَن اوس یہِ بیان این سی بانی شیخ محمد عبداللہ سٕنٛزِ 44برسی  ہٕنٛدِس موقعَس پٮ۪ٹھ پرٛژار ؤسیٖلن سۭتۍ کتھ باتھ کٔرِتھ دِیُتمُت۔ تٔمۍ ووٚن زِ نیشنل کانفرنس حکومت اقتدارس منٛز یِنہٕ برٛونٛہہ ٲسۍ کٔشیٖرِ ہٕنٛدۍ لُکھ انتہٲیی غربتَس منٛز زُنٛدٕ تہٕ أمۍ سٕنٛدِ امہِ بیانہٕ سٍتۍ چھِ وارِیاہ اختلاف کھڑا گٔمٕتۍ۔