کٔشیٖر منٛز NHM مُلٲزِمن ہٕنٛزِ ہرتالہٕ سۭتۍ  گٲمی صحتٕچ خٕدمات مُتٲثِر۔

نیشنل ہیلتھ مشنٕکۍ (این ایچ ایم) مُلٲزمَو چھُ اعلان کوٚرمُت زِ تِم بڑاوَن پنُن ہڑتال بیٚیہِ ترٛٮ۪ن دۄہَن تام۔ أتھۍ دوران چھِ ہڑتالہٕ کِنۍ گٲمی علاقَن منٛز صحتٕچ خٕدمات خاص پٲٹھۍ مُتٲثِر گٔمٕژ۔ این ایچ ایٚم مُلٲزِمن ہِنٛدِ ہڑتالَن چھُ جموں و کشمیرَس منٛز صحتَس مُتلِق مُختٔلِف خٔدماتن پٮ۪ٹھ اثر ترٛاوُن شروع  کوٚرمُت۔ مُلٲزِم چھِ پننٮ۪ن واریاہ کالہٕ پٮ۪ٹھہٕ زیرِ التوامطالبَن باپتھ احتجاج کران، یِمَن منٛز نوکری ہٕنٛز حفاظت، تنخواہَس منٛز نظرثانی تہٕ ریٹائرمنٹَس سۭتۍ وابستہٕ فٲیدٕ شٲمِل چھِ۔ احتجاجی این ایچ ایم مُلٲزمَن مُطٲبِق چھُ ہڑتالُک مقصد حکوٗمتَس پٮ۪ٹھ دباو تراوُن۔ 

ہڑتالہٕ کِس نٔتیٖجَس منٛز چھِ بُنیٲدی صحت مرکزَن تہٕ باقٕے صحت ادارن منٛز باقٲعدٕ کٲم مُتٲثِر گٔمٕژ، ییٚمہِ سۭتۍ مریضَن تہٕ دیکھ بھال کرَن والٮ۪ن خٲطرٕ واریاہ مُشکِلات پٲدٕ گٔمٕتۍ چھِ۔…