پُلیٖس حِراستَس منٛز مُبینہٕ موت: صِرِف ہاونہٕ خٲطرٕ معطلی، بی این ایس کِس دفعہٕ 102 ہَس تحت گٔژھِ پولیس افسرَن خٕلاف ایف آئی آر درٕج کرنہٕ یُن: رجت رامِیت سُنٛد مُطالبہٕ ۔

جموں ضِلعہٕ کِس آر ایس پوٗرہ سب ڈویژنَس منٛز بارڈر پولیس پوسٹ  چکروی پٮ۪ٹھ 32 ؤہرِس  دلِت نوجوان آُتم چند سٕنٛدِ مُبینہٕ حراستَس منٛز موتُک معاملہٕ چھُ تیز گوٚمُت۔ اَمہِ افسوسناک واقعہٕ پتہٕ گوٚو آر ایس پوٗرہ تہٕ چکرُوی چوکَس منٛز بٔڑِس پیمانَس پٮ۪ٹھ عوٲمی اشتعال پٲدٕ، ییٚتہِ مُظٲہِرینو انصاف منٛگنہٕ خٲطرٕ دھرنا دِیُت۔ 

اَتھ وقتَس دوران کٔر بھیم آرمی تہٕ آزاد سماج پارٹی ہٕنٛزِ اعلیٰ قیادژ براہ راست مداخلت، تہٕ دِتُکھ پولیسٕچ کاروٲیی محض "انجیر پنہٕ” قرار۔ بھیم آرمی ہُنٛد قومی صدر تہٕ رُکُن پارلِمٮ۪نٛٹ چندر شیکھر آزادَن کٔر احتجاجی جایہِ پٮ۪ٹھ موجود رہنُماہن تہٕ مُتٲثِر خاندانَن سۭتۍ فونَس پٮ۪ٹھ کَتھ باتھ۔ تٔمۍ کٔر اتھ افسوسناک واقعَس پٮ۪ٹھ تعزیتُک اظہار تہٕ دِیُتُکھ  یٔقیٖن زِ تٔمۍ سٕنٛز پارٹی کرِ قومی سطحَس پٮ۪ٹھ مظلوم خاندانس انصاف حٲصِل کرنہٕ خٲطرٕ کٲم۔