او جی ڈبلیو ماڈیولِیُک راجوری جموں و کشمیرس منٛز پردٕہ فاش،3 نَفر گِرِفتار۔

جموں و کشمیر پولیسَن کوٚر  راتھ  دعویٰ زِ تِمَو چھُ پونچل علاقَس منٛز أکِس اوور گراؤنڈ کارکُن (او جی ڈبلیو) نیٹ ورک بے نقاب کوٚرمُت، یُس مُبینہٕ پٲٹھۍ ممنوعہ تنظیم لشکر طیبہ ہَس سۭتۍ وابستہٕ چھُ۔ اَکۍ اہلکارَن ووٚن زِ اَتھ سلسلَس منٛز چھِ ترٛےٚ نَفر گِرِفتار کرنہٕ آمٕتۍ۔

پُلسہٕ ترجمانَن وون زِ راجوری کِس کوٹ چاروال تریتھس پٮ۪ٹھ چھِ  ذاکر حُسین تہٕ محمد اعظم تہٕ ضِلعہٕ کہِ آدھان علاقہٕ پٮ۪ٹھہٕ چُھ محمد مشتاق سرگرم دہشت گرد ماڈیول کِس تحقیقاتَس دوران گِرِفتار کرنہٕ آمٕتۍ۔

تِمَو ووٚن زِ اِبتِدٲیی تحقیقاتَو سۭتۍ چھُ یہِ پتہ لگان زِ مشكوُک افراد ٲسۍ مبینہ طور دہشت گردَن لاجسٹک مدد، محفوٗظ وتہٕ تہٕ باقی زمینی مدد فراہم کرنس منٛز مُلوث۔

تِمَو ووٚن بیٚیہِ زِ تحقیٖقات سۭتۍ چھُ یہِ تہِ پے لگان زِ مشكوُک افرادو چھُ مبینہ طور رہنما ہن ہٕنٛدۍ پٲٹھۍ کٲم کٔرمٕژ تہٕ دہشت گرد گروپَن ہِنٛز وادی کشمیرَس کُن نقل و حرکتَس منٛز سہولت فراہم کٔرمٕژ۔