ہمالیٲیی علاقس منٛز چھےٚ یِکہٕ وٹہٕ کٲم کرنٕچ ضرورت: پروفیسر شکیل احمد رومشو

مشہوٗر مٲہرِ ارضیات تہٕ اسلامک یونیورسٹی آف سائنس اینڈ ٹیکنالوجی ہٕکۍ وائس چانسلر، پروفیسر شکیل احمد رومشوَن ووٚن أکِس خصوٗصی انٹرویوَس منٛز زِ پوٗرٕ جنوبی ایشیاہَس منٛز تہٕ خاص طور سٲنِس مُلکَس منٛز  چُھ عام طور آفت پتہٕ یِنہٕ والٮ۪ن حالاتن پٮ۪ٹھ زِیٛادٕ توجہ دِنہٕ یِوان۔ اگر توٚہۍ 2014  کِس سٔہلابٕچ مِثال نِوان چھِو، تَمہِ وِزِ جموں و کشمیرٕکۍ  حکوٗمتَن دعویٰ کوٚرمُت زِ تقریباً اکھ لَچھ کرور رۄپیہِ گوٚو ضایع۔ اگر امہِ رقمُک اکھ لۄکُٹ حصہٕ تہِ ‘آفتن برٛونٛہہ’ اقداماتن پٮ۪ٹھ خرچ کرنہٕ ییہِ ہے یقیناً گژھہِ  ہےیہِ نۄقصان واریاہ کم۔

اوے چُھ آفت برونٛہہ تیاری تہٕ حکمت عملی پیٹھ زیادٕ توج دِنٕچ ضرورت۔ یِتھے پٲٹھۍ چھُ وُچھنہٕ آمُت زِ کُنہِ تہِ آفژ دوران چھِ کینٛہہ عوٲمل آسان یِم نۄقصانٕچ شِدَت بڑاوان چھِ۔ چاہے یہِ سٔہلاب آسہِ یا بیٚیہِ کانٛہہ قۄدرتی آفت، غٲر منصوٗبہٕ بند بستیہٕ تہٕ تعمیٖرات چھِ اَتھ منٛز اکھ بوٚڈ منفی کردار ادا کران۔