وزیر اعظم مودیَن کوٚر وایناڈَس منٛز پَسٮ۪و سۭتۍ متٲثر علاقَن ہُنٛد ہوٲیی جٲیزٕ۔
وایناڈ/نٔو دِلہِ: ؤزیٖر اعظم نریندر مودیَن کوٚر بَٹہٕ وارِ دۄہ کیرالہ کِس وایناڈَس منٛز پَسہٕ کھسنہٕ سۭتۍ متٲثر علاقَن ہُنٛد ہوٲیی جٲیزٕ۔
مسٹر مودی ووت صُبحٲے نَیہِ دِلہِ پٮ۪ٹھٕ کیرالہ ۔ علاقُک ہَوٲیی جٲیزٕ کرنہٕ وِزِ اوس مودیَس سۭتۍ کیرالہ ہُک وزیر اعلیٰ پنارائی وجین تہِ۔
ہوٲیی جٲیزٕ پتہٕ کَرِ مسٹر مودی ذٲتی طور آفات سۭتۍ متٲثر علاقن ہُنٛد دورٕ تہٕ کَرِ حالاتُک جٲیزٕ۔
ذٔرایعو مُطٲبِق چھُ مسٹر مودی تتہِ مقٲمی لوٗکَن سۭتۍ مِلِتھ تہٕ تِہنٛدٮ۪ن مسلن پٮ۪ٹھ کَتھ باتھ کرنُک تہِ امکان۔
نَیہِ دِلہِ منٛز ووٚن ؤزیٖر اعظم سٕنٛدِ دفترَن زِ ہَوٲیی جٲیزٕ دوران کوٚر مسٹر مودیَن تَتھ علاقُک تہِ معٲینہٕ ییٚتہِ پٮ۪ٹھٕ پَسہٕ پَسُن شُروٗع گوٚو۔ تٔمۍ کوٚر پنچاریامتم، منڈیکی تہٕ چوڈالامالا علاقَن ہُنٛد ہوٲیی جٲیزٕ تہِ۔
30 جولائی دۄہ ماحولیٲتی لحاظ سۭتۍ حساس مغربی گھاٹ علاقَس منٛز گٔیہِ پَسنہٕ سۭتۍ تقریباً 200 نفر ہلاک تہٕ ہتہٕ بٔد زخمی ۔ سیٚٹھا روٗد پینہٕ کِنہِ گوٚو اروانجی پُزا دٔریاوَس منٛز آب یِنہٕ سۭتہِ پَسہٕ کھسنہٕ سۭتہِ ۔