جموں و کشمیر: ایل او سی یَس پٮ۪ٹھ کٔر پٲکِستٲنۍ فوجَن بےٚ اشتعال فائرنگ۔

پٲکِستٲنۍ فوجَن کٔر لگاتار ٲٹھمہِ لَٹہِ جنگ بٔنٛدی ہِنٛدِس معاہدس خلاف ورزی تہٕ جُمعہ تہٕ بَٹہٕ وارِ دۄہ درمیٲنی رٲژ کٔرٕن جموں و کشمیر کٮ۪ن سرحدن پٮ۪ٹھ بےٚ اشتعال فائرنگ ۔
"1 تہٕ 2 مئی 2025 چہِ درمیٲنی رٲژ کٔر پٲکِستٲنۍ فوجی چوکٮ۪ن جموں و کشمیرس منٛز کپواڑہ، بارہمولہ، پونچھ، نوشہرہ تہٕ اکھنوٗرَس برٛونٛہہ کنہِ لائن آف کنٹرول (ایل او سی) اَپارِ پٮ۪ٹھٕ بےٚ اشتعال لۄکٹٮ۪ن ہتھیارن ہٕنٛز فائرنگ ۔ ‘‘
تٔمۍ ووٚن زِ تَتہِ تعینات فوجی جوانَو دِیُت اَمیُک مؤثر طریقہٕ سۭتۍ جواب۔ وۄنٛہِ گوٚو، دۄشوٕنی طرفن آیہِ نہٕ کانٛہہ تہِ جٲنی نۄقصانٕچ اطلاع۔
بوموارِ دۄہ ہاٹ لاینَس پٮ۪ٹھ ہندوستان تہٕ پاکستان کٮ۪ن ڈائریکٹر جنرلَن آف ملٹری آپریشنَن درمیان کَتھ باتھ کرنہٕ باووٚجوٗد روٗز جنگ بٔنٛدی ہٕنٛدِ معاہدٕچ خلاف ورزی جٲری۔
ایل او سی یَس پٮ۪ٹھ گٔیہِ فائرنگ ہُنٛد تبادلہٕ 22 اپریل پہلگامَس منٛز وحشیانہٕ دہشت گردانہ حملہٕ پتہٕ ہندوستان تہٕ پٲکستانَس درمیان شدید تناؤَس دوران یَتھ منٛز 25 سیاح تہٕ اکھ مقٲمی باشندٕ ہلاک گٔیہِ۔