کٔشیٖرِ منٛز جُلاے کِس گۄڈٕنِکِس ہفتس دوران روٗدُک اِمکان .

شٔدیٖد گرمی ہٕنٛزِ لہرِ منٛز چھےٚ موسمیات محکمَن جُلاے کِس گۄڈٕنِکِس ہفتس دوران وادی کٔشیٖرِ منٛز روٗد پیٚنٕچ پیشین گوئی کٔرمٕژ۔ محکمہٕ کِس مشورَس مُطٲبِق چھُ کینٛہَن کمزور مقامَن پٮ۪ٹھ اچانک سٔہلاب، پَسہٕ پَسُن، میٚژِ پَسُن، یا کَنہِ پٮ۪نُک اِمکان۔ مُتعلقہٕ محکمہٕ کِس ترجُمانَن ووٚن زِ 30 جوٗن ہٮ۪کہِ وادی منٛز موسم جزوی طور اوٚبُر ٲسِتھ تہٕ کینٛہَن علاقَن منٛز چھُ گرجَس سۭتۍ ہلکہٕ روٗد پٮ۪نُک اِمکان، ییٚلہِ زَن جموں علاقَس منٛز کینٛہہ جایَن پٮ۪ٹھ درمیٲنی روٗد پیٚنُک اِمکان چھُ۔