ماجہِ زیٚوِ ہٕنٛزِ ترقی تہٕ فروغس متعلق زوردار دعواہن درمیان چُھ اسمبلی رُکنو مقٲمی زبانہِ منز شایع سپدن وٲلِس وٲحِد کٲشِرِس روزنامہ ‘ کٔہوٹس’ اشتہار بند آسنس پیٹھ تشویشُک اظہار کوٚرمُت

ماجہِ زیٚوِ فروغ دِنہٕ تہٕ ترقی دِنہٕ خٲطرٕ حکوٗمتٕکۍ عظیم دعواہن درمیان، کٔر اسمبلی رُکنو قونوٗن ساز اسمبلی ہٕنٛدِس احاطس نٮ۪برٕ کٔنہِ میڈیاہس سۭتۍ کتھ باتھ تہٕ کوٚرُکھ کٲشرِ زبٲنۍ منٛز شایٮ۪ سپدن وٲلِس اخبارس روزنامہ کہؤٹس اشتہار بند آسنس پٮ۪ؠٹھ تشویش تہٕ افسوسُک اظہار، کشمیر پریس سروسٕکۍ نامہٕ نگار سٕتۍ کتھ باتھ کٔرِتھ ووٚن سینئر سیاست دان تہٕ بانڈی پورہٕکۍ ایم ایل اے، نظام الدین بٹن زِ کٲشِر زبان چھےٚ سٲنی شناخت تہٕ اخباریا باقی لۄکٕٹۍ اشاعت نظر انداز کرٕنۍ چھِ غٲر منصفانہٕ تہٕ غٲر اصولی۔ تٔمۍ دِیُت زور زِ یِمن گژھہِ زِیٛادٕ کھۄتہٕ زِیٛادٕ ترجیح دِنہٕ یِنۍ أتھۍ دوران ووٚن سینئر سیاست دان تہٕ ایم ایل اے عیدگاہ، مبارک گُلَن زِ کٲشرِ زبانہِ منٛز شایع گژھن وٲلِس اخبارس اشتہار نہ دِنۍ چھےٚ سانہِ ماجہِ زیٚوِ سۭتۍ ناانصافی تہٕ وونُن زِ اَتھ پٮ۪ٹھ چھُ دُبارٕ غور کرنٕچ تہٕ میڈیا پالیسی منٛز اتھ اہمیت دِنٕچ ضرورت۔