فروری شروعاتَس منٛز کٔشیٖرِ منٛز شیٖن تہٕ روٗدُک پٮ۪نُک اِمکان۔

محکمہ موسمیات چہِ پیشن گویی مُطٲبِق چھُ وادی کشیرِ منٛز بیٛکہِ رٮ۪تہٕ فروری کِس آغازس منٛز شیٖن تہٕ روٗد پیٚنُک اِمکان۔
مُتعلقہٕ محکمٕکۍ ترجمانَن ووٚن زِ 31 جنوری تہٕ 1 فروری چھُ وادی منٛز واریاہَن جاین ہلکہٕ پٮ۪ٹھٕ درمیٲنی شیٖن یا روٗد پیٚنہٕ ممکن، تہٕ اَتھ وقتَس دوران ہیکہِ کینٛہَن مقامَن تیز واو تہِ ٲسِتھ۔
تٔمۍ ووٚن زِ پتہٕ چھُ 2 فروری شامَس پٮ۪ٹھٕ 3 فروری دُپہرَس تام واریاہَن جاین ہلکہٕ شیٖن یا روٗد پیٚنُک امکان۔
تٔمۍ ووٚن زِ پتہٕ چھُ 4 پٮ۪ٹھٕ 6 فروری تام موسم عام طور خۄشٕک روزنُک امکان۔
ترجمانَن ووٚن زِ 7 فروری چھُ وادی منٛز کینٛہَن جاین ہلکہٕ شیٖن یا روٗد پیٚنُک امکان۔
تٔمۍ ووٚن زِ اَمہِ پتہٕ چھُ 8 پٮ۪ٹھٕ 10 فرؤری تام وادی ہُنٛد موسم عام طور خۄشٕک روزنُک اِمکان۔
پننِس ایڈوائزری منٛز چھُ محکمَن ٹرانسپورٹرن تہٕ مسافرَن انتظامیہ تہٕ ٹریفک حُکامن ہٕنٛزِ ہِدایَتہٕ مُطٲبِق پنٕنۍ سفرُک منصوبہٕ بندی کرنٕچ درخواست کٔرمٕژ۔