سٲبِقہٕ تحصیل دار آو رُشوَت خوری ہٕنٛدِس معاملَس منٛز مُجرِم قرار دِنہٕ،اکھ ؤرۍ یَس قٲدُک سزا.

سرینگرٕچ أکہِ خصوٗصی انسداد رُشوَت خوری عدالتَن دِیُت أکِس سٲبِقہٕ تحصیل دارَس 16 ؤرۍ پرٛٲنہِ رُشوَت خوری کیسَس منٛز مُجرِم قرار دِنہٕ۔ نگرٲنی ٹیمہِ ہٕنٛدِ تحقیقاتَس منٛز آو پتہ لگان زِ تٔمۍ ٲس زمینی تنازعہٕ پٮ۪ٹھ اثر انداز گژھنہٕ باپتھ رُشوَت منگمٕژ۔ اَتھ مقدمُک عنوان اوس ‘رِیاست (وۄنۍ جموں و کشمیر یو ٹی) بمقابلہ ویجیلنس آرگنائزیشن کشمیر (وۄنۍ اے سی بی)’ محمد اکرم خانَس خٕلاف، تہٕ یہِ فٲصلہٕ دِیُت ژٔندٕروارِ دۄہ انسداد بدعنوانی ہُنٛد خصوصی جج تسلیم عارفَن ۔محمد اکرم خان اوس تمہِ وقتہٕ جواہر نگر، سری نگرُک روزَن وول جلال الدین خان سُنٛد نیٚچُو، تَمہِ وِزِ چادورہُک تحصیل دار تعینات۔ تٔمِس خٕلاف آیہ 20/2010 نمبر ایف آئی آر درٕج کٔرمٕژ پولیس تھانہٕ ویجیلنس آرگنائزیشن کشمیر طرفہٕ اینٹی کرپشن بیورو تحت ، یُس شالینہ چادورہَس منٛز روزَن وٲلِس أکِس شہری تسدُق حسین بٹ سٕنٛزِ شِکایتَس پٮ۪ٹھ مبنی اوس۔ تصدق سندِ مُطٲبِق اوس أمۍ سٕنٛدِس عیالس ہُنٛد جائیدادُک تنازعہ تحصیل دار سٕنٛدِس دفترس تام ووتمُت۔تصدق سندِ مُطٲبِق اوس مُلزِمن (تحصیلدار) گۄڈٕ شِکایت کَرن وٲلہِ سٕنٛدِس پیٚتٕر سٕنٛدِس حقس منٛز فٲصلہٕ دِیُتمُت۔