کٔشیٖرِ منٛز تجارتی گیس کٔمی ، ہوٹل، ریسٹورَنٹ تہٕ ہاسٹل بند گژھنس تیار.

عید چھُٹی پتہٕ صُبحہ پیٹھٕ، ییٚلہِ مُختٔلِف اِدارٕ دُبارٕ کٲم شُروٗع چھِ کران، سرینگرَس منٛز چھِ اکھ کلاؤڈ کچن سروس یۄس گَرَن گَرَن تام کھٮ۪ن واتناوان چھِ وُنہِ تہِ بنٛد۔ ‘او ٹِفن’ ناوُک یہِ اسٹارٹ اپ چھُ پٔتِمٮ۪و سَتَو ؤرۍ یَو پٮ۪ٹھ کٲم کران، چھُ روزانہٕ تقریباً 200 خٔریٖدارَن کھٮ۪ن فراہم کران، یَتھ منٛز ہسپتال، ہاسٹل تہٕ کارپوریٹ آفس شٲمِل چھِ۔امہِ دکانُک مٲلِک یُس کٔشیٖرِ منٛز ‘ٹِفِن مین’ ناوٕ سۭتۍ مشہوٗر، رایس احمد ڈار چھُ وُنکیٚس بیکار بِہِتھ۔ تٔمۍ ووٚن ای ٹی بھارتَس: ‘أسۍ ٲسۍ ژورَو دۄہو پتہٕ از کٲم شُروٗع کَرٕنۍ، مگر بازرَس منٛز چھِنہٕ تجٲرتی گیس سِلنڈر دٔستِیاب۔ بہٕ چھُس صبحٲے پیٹھٕ گیس سپلائرَس فون کران، مگر تِم چھِ مےٚ شامَس فون کرنہٕ خٲطرٕ ونان ۔’ أمۍ سٕنٛدِس کچنس منٛز چھِ دۄہہ گیس سلنڈر ضروٗرت۔ایران، اسرائیل تہٕ امریکہس درمیان مغربی ایشیاہَس (مشرق وسطیٰ) منٛز جٲری تناضہٕ سۭتۍ چھُ ڈار سُنٛد کاربار متٲثر گوٚمُت۔ جموں و کشمیر اِنتِظامیہَن چھُ داواہ کوٚرمُت زِ گَریلوٗ گیس چھُ دۄن ہفتَن خٲطرٕ دٔستِیاب تِکیازِ مرکٔزی حکوٗمتَن چھُ ‘ضروٗری کموڈِٹی ایکٹ’ تحت گَریلوٗ خٔریٖدارَن ترجیح دِژمٕژ۔