یاترا ختم گژھنہٕ پتہٕ تہِ چھِ واریاہَن جاین پابٔنٛدیہِ برقرار، ییٚمہِ سۭتۍ کاربٲرِ ۍحلقہٕ شویشُک شکار چھِ۔ ۔

اَمرناتھ یاترا مۄکلنہٕ پتہٕ تہِ چُھ تٲجرن، دُکاندارَن، تہٕ سیاحتَس سۭتۍ وابستہٕ لوٗکَن مُشکِلَن تہٕ مٲلی نۄقصان درپیش تِکیازِ اننت ناگ ضِلعہٕ کٮ۪ن واریاہَن اہم تجارتی تہٕ سیاحتی  جاین پٮ۪ٹھ چھِنہٕ پابٔنٛدی پوٗرٕ پٲٹھہِ تُلنہٕ آمٕژ۔ 

تٲجِر، دُکاندارَو تہٕ سیاحتَس سۭتۍ وابستہٕ لوٗکَو ووٚن زِ یِمَن چھُ یقین زِ یاترا ختم گژھنہٕ پتہٕ یِن تمام پابٔنٛدیہِ تِمو جایو پٮ۪ٹھ ہٹاونہٕ یِم یاتراہَس دوران حِفٲظتی اِنتِظامَن خٲطرٕ محدوٗد آسہٕ۔ تاہم، تِمن ہُنٛد ونُن چھُ زِ واریاہَن مقامَن پٮ۪ٹھ چھِ وُنہِ تہِ پابٔنٛدیہِ موجود۔ امہِ صورتحالہٕ کِنۍ چھِنہٕ کارٕبٲرۍ سرگرمی معمولس پٮ۪ٹھ واپس آمٕژ تہٕ مُتعلقہٕ شعبَن ہٕنٛدٮ۪ن لوٗکَن  چُھ امیُک تشویش ۔ 

قاضی گُنڈَس منٛز، یَتھ کٔشیٖرِ ہُنٛد دروازٕ تہِ وَنان  چھِ چُھ دُکاندارَو تہٕ تٲجرَو حالٕے بازرَس کُن گژھن واجنٮ۪ن کینٛژھن وَتن پٮ۪ٹھ مسلسل پابندِین خلاف احتجاج تہِ کوٚرمُت تِہُند ونُن چُھ زِ امہِ سٍتۍ چُھ تِہُنٛد روزگار متٲثر گژھان۔