پی ڈی پی چھُ الحاق کہِ دۄہُک احترام کران یُس جموں و کشمیر أکِس عظیم مُلکَس سۭتۍ جوڑان چھُ: محبوبہ مفتی

جموں و کشمیرٕکۍ سٲبقہٕ وزیر اعلیٰ تہٕ پیپلز ڈیموکریٹک پارٹی (پی ڈی پی) ہٕکۍ سربراہ محبوبہ مفتی یَن دِیُت الحاق کہِ دۄہ اکھ اَہَم بیان۔ تٔمۍ ووٚن زِ سۄ چھِ مُلکہٕ کٮ۪ن لوٗکَن تہٕ حکوٗمت ہندَس یاد دِنۍ یژھان زِ تِم کَرِ 1947 ہَس منٛز جموں و کشمیر تہٕ ہندوستانَس درمیان دستخط کٔرمٕتۍ ‘الحاق دستاویزَس’ ہُنٛد احترام، یُس سیکولر اصولن تہٕ خطہٕ کٮ۪ن جذباتن پٮ۪ٹھ مبنی اوس۔ سرینگرَس منٛز پی ڈی پی ہیڈ کوارٹرَس منٛز آز أکِس پارٹی تقریٖبَس منٛز ووٚن محبوبہ مفتی یَن زِ أسۍ چھِ اَمہِ دۄہُک احترام کران ییٚلہِ أسۍ أکِس عظیم ملکُک حصہٕ بنیوو۔ مگر اتھ عظیم ملکَس پزِ تِم حالات، واقعہٕ تہٕ جذبات تہِ یاد تھاوُن یِمو جموں و کشمیرس منٛز شٲمِل گژھنٕچ بُنیاد بنییہِ۔’ تٔمۍ ووٚن بیٚیہِ زِ جموں و کشمیرٕچ صورتحال تہٕ یُس وۄنۍ مُلکہٕ کٮ۪ن باقٕے حِصَن منٛز پھٔہلان چھُ سُہ گژھِ قوم کٮ۪ن لوٗکَن خٲطرٕ جموں و کشمیرَس منٛز کیا سپدان چھُ اَتھ مُتعلِق اکھ ‘وارننگ’ ہُنٛد کٲم کرٕنۍ۔ تٔمۍ ووٚن، ‘أسۍ کٔر تتھ ہندوستانس سۭتۍ الحاق یُس گاندھی، نہرو تہٕ امبیڈکرُک اوس۔