کشتواڑ جھڑپ: جونیئر کمیشنڈ آفیسر (جے سی او) ہلاک، باقی 3 زخمی۔

جموں و کشمیر کِس کشتواڑ ضلعہٕ کِس کیشون علاقَس منٛز گوٚو سیکورٹی فورسَن تہٕ دہشت گردَن درمِیان مُقابلَس منٛز اکھ جونیئر کمیشنڈ آفیسر (جے سی او) ہلاک۔
یہِ چھُ معلوم گوٚومُت زِ سیکورٹی فورسَو چھُ أکِس بٔڑِس جنٛگلٲتی علاقَس گیرٕ بٔنٛدی کٔرمٕژ تہٕ ژلنٕچ وَتہِ پٮ۪ٹھ نظر تھٲومٕژ۔
خبرو مُطٲبِق کوٚر حِفاظتی فوجن قٲبلِ اعتماد معلوٗمات حٲصِل کرنہٕ پتہٕ آتھٕوارِ دۄہ صُبحٲے کشتواڑ کِس کیشون علاقس منٛز محاصرٕ تہٕ تلاشی مہم شُروٗع۔
دِفٲعی ذٔرایعو مُطٲبِق ییٚلہِ حِفاظتی اہلکار مشتبہ جایہِ نزدیٖک وٲتۍ، تَتہِ ژوٗرِ روزَن وٲلۍ دہشت گردَو کٔر اندھا دھند گولہِ چلاوٕنہِ شُروٗع، ییٚمہِ کِس نٔتیٖجس منٛز أکِس فوجی اَفسَرس سۭتۍ ژور پیرا کمانڈو زخمی گٔیہِ۔
تٔمۍ ووٚن زِ زخمیَن آیہِ جلدٕی نزدیٖکی ہسپتالَس منٛز دٲخٕل کرنہٕ ییٚتہِ جونیئر کمیشنڈ آفیسر (جے سی او) راکیش کمار زخمَن ہُنٛد تاب نہٕ سۭتۍ موٗد۔