وزیر اعلیٰ عمر عبداللہ تہٕ مرکزی وزیر زراعت شیوراج سنگھ چوہانَن کٔر أکِس اعلیٰ سطحی جٲیزٕ اجلاسٕچ مشترکہ صدارت ۔

برٮ۪سوارِ دۄہ جموں و کشمیرٕکۍ وزیر اعلیٰ عمر عبداللہ تہٕ مرکزی وزیر شیوراج سنگھ چوہانَن کٔر جموں و کشمیرَس منٛز زراعت تہٕ دیہی ترقی پٮ۪ٹھ أکِس اعلیٰ سطحی جٲیزٕ اجلاسٕچ مشترکہ صدارت ۔ اتھ دوران آو جسمٲنی تہٕ مٲلی ترقی، اہم سکیمَن تہٕ محکمہٕ چن کامیٲبیَن ہُنٛد جٲیزٕ نِنہٕ، زمینی سطحٕکۍ اثرات تہٕ جامع ترقی پٮ۪ٹھ خاص توجہ دِنہٕ۔ امہِ برٛونٛہہ کوٚر وزیر اعلیٰ ہن شیوراج سنگھ چوہانَس گرمجوشی سان خٲر مقدم تہٕ پہلگام واقعہٕ پتہٕ کوٚرُن تٔمۍ سُنٛد فوری جواب دِنہٕ خٲطرٕ شُکُر۔