سپیکر عبدالرحیم راتھرن کوٚر اسمبلی منٛز ریزرویشن پالیسی پیٹھ بحث کرنُک اجازت دِنہٕ نِش انکار۔

جموں و کشمیر اسمبلی منٛز گوٚو ژٔندٕروارِ دۄہ تَمہِ وِزِ تناعضہٕ ییٚلہِ پیپلز کانفرنسٕکۍ صدر سجاد غنی لونَن ریزرویشن پالیسی منٛز اصلاح کرنس منٛز حکوٗمتٕچ ناکامی پٮ۪ٹھ بحث کرنہٕ خٲطرٕ ملتوی کرنٕچ تحریک پیش کٔر۔ تاہم سپیکر عبدالرحیمَن کٔر یہِ تحریک رَد۔ سوالیہ وقفہٕ ختم گژھنہٕ پتہٕ ووٚن سجاد لونَن ایوانَس زِ تٔمۍ چھِ تحفظات کِس معاملَس پٮ۪ٹھ بَحَژ کرنہٕ خٲطرٕ ملتوی کرنٕچ تحریک جمع کٔرمٕژ تِکیازِ حکوٗمت چھِ یہِ حساس معاملہٕ لگاتار نظر انداز کران۔ تٔمۍ ووٚن طنزیہ پٲٹھۍ تبصرٕ، ‘یہِ چھُ اکھ پوسٹ ڈیٹ چیک یُس آفتٕچ ضمانت چھُ دِوان۔’ جوابَس منٛز کوٚر سپیکر عبدالرحیم راتھن واضح زِ یہِ معاملہٕ ہٮ۪کو نہٕ ایوانَس منٛز بحث خٲطرٕ تُلِتھ تِکیازِ یہِ چھُنہٕ حالٕے نوعیتَس منٛز تہٕ نہ چھُ قونوٗنَن تحت اجازت۔ تٔمۍ ووٚن زِ ‘ایوان کِس طریقہٕ کار کٮ۪ن قونوٗنَن مُطٲبِق ہیکَو ملتوی کرنٕچ تحریٖک صرف حالٕے نوعیتٕک معاملَن پٮ۪ٹھ پیش کٔرِتھ۔