سرینگر کِس ایچ ایم ٹی علاقَس منٛز نار، أکِس مکانَس نۄقصان

رٲژ دوران گوٚو سرینگر کِس ایچ ایم ٹی علاقَس منٛز نار لگنہٕ کِس واقعَس سۭتۍ أکِس زٕ پورٕ رہٲیشی مکانَس شٔدیٖد نۄقصان۔ذٔرایعَو دِژ اطلاع زِ ایچ ایم ٹی، سری نگر کِس سیکٹر 8 کِس أکِس گَرَس منٛز لوٚگ رٲژ نار تہٕ نارَن لوٚگ مکانَس لٔگِتھ۔فائر اینڈ ایمرجنسی ڈیپارٹمنٹٕکۍ أکۍ اہلکارَن ووٚن زِ ییٚلہِ نارٕچ اطلاع آیہِ مِلنہٕ، نارٕکۍ ٹینڈر آیہِ جایہِ پٮ۪ٹھ سوزنہٕ، یِمو فوری طور کٲم کٔر، نار قوبوٗ کٔرِکھ تہٕ رُکٲوُکھ یہِ مزید پھٔہلنہٕ نِش۔تٔمۍ ووٚن زِ امہِ واقعہٕ سۭتۍ گوٚو أکِس دۄن پورَن ہِنٛدِس رہٲیشی مکانَس سٮ۪ٹھاہ نۄقصان۔نارُک وجہ چھُ شارٹ سرکٹ وننہٕ یِوان۔ وونہِ گو٘ اَتھ واقعَس منٛز چھُنہٕ کانٛہہ تہِ جٲنی نۄقصان ہٕنٛز خبر۔یہِ چھُ قٲبلِ ذِکِر زِ وادی منٛز اَکثر نار لگنٕکۍ واقعہٕ چھِ لوٗکَن منٛز بٔڑِس پیمانَس پٮ۪ٹھ تشویشُک بٲعث بٔنِتھ۔حکامَو چھُ لوٗکَن زور دِیُت زِ تِم کرَن احتِیٲطی اِقدامَن پٮ۪ٹھ سختی سان عمل کرن۔